تێگەیشتن لە جیاوازیی نێوان کۆڵسترۆڵی تەندروست و کۆڵسترۆڵی خراپ پێویستە بۆ تەندروستیی دڵ.
بەپێی پێگەی “مایۆ کلینیک”، لیزلی چۆ پسپۆڕی نەخۆشییەکانی دڵ ڕوونیکردووەتەوە، پرۆتینی چەوری کە چڕییەکەی کەمە و بە “کۆڵسترۆڵی خراپ” ناسراوە، دەبێتە هۆی زیادبوونی نیشتەنییەکانی چەوری لە خوێنبەرەکاندا و ئەمەش وا دەکات ئەو خوێنبەرانە ڕەق و تەنگ ببن و ڕێگریی لە هاتوچوونی خوێن و ئۆکسجین بکەن، لە کاتێکدا کە پرۆتینی چەوریی چڕ-ی ناسراو بە “کۆڵسترۆڵی تەندروست” کار بۆ لەناوبردنی کۆڵسترۆڵی خراپی ناو جەستە دەکات.
کۆڵسترۆڵ ماددەیەکی مۆمییە و لەناو خوێندا هەیە، جەستە لە دروستکردنی خانەی تەندروستدا بەکاریدەهێنێت، بەڵام بەرزبوونەوەی ڕێژەکەی دەبێتە هۆی زیادبوونی مەترسیی جەڵتە.
چەندین ڕێگا هەیە بۆ ڕێکخستنەوەی ڕێژەکانی کۆڵسترۆڵی جەستە، وەک پەیڕەوکردنی سیستمێکی تەندروستانەی خواردن کە خواردنی ڕیشاڵەکان و کەمکردنەوەی گۆشتی سوور دەگرێتەوە، هەروەها هەفتەی 5 ڕۆژ ئەنجامدانی چالاکیی وەرزشی، بەجۆرێک ڕۆژانە لە 30 خولەک کەمتر نەبێت.
