پاش شکستهێنانی ڕوسیا لە بەکارهێنانی چەک و ماشێنە جەنگییە عەمبارکراوەکانیدا، دەزگاکانی هەواڵگریی ئۆکرانیا بانگەشەی ئەوە دەکەن هۆکارەکەی گەندەڵی و بێسەروبەرەیی بێت.
هەواڵگریی ئۆکرانیا ئاماژەی بەوەداوە، بە هۆی گەندەڵی و بێسەروبەرەییەوە چەندین چەک و ئامێری جەنگی لە گەنجینەکانی عەمبارکردنی دوورمەودای ڕوسیا دیارنەماون، هەر لەبەر ئەوەشە وڵاتەکە ناتوانێت لەپێناو کەمکردنەوەی زیانەکانی جەنگدا ئەم چەک و ئامێرانە نوێبکاتەوە و سوودیان لێببینێت.
بەپێی ڕاپۆرتێکی پێگەی “سکای نیوز”ی بەریتانی، هیچ لایەنێکی سەربەخۆ ئەم هەواڵەی پشتڕاست نەکردووەتەوە، بۆیە هەندێک لە چاودێران لایانوایە کە دەکرێت تەنیا بەشێک بێت لە جەنگی سارد و دەروونیی نێوان دوو وڵاتەکە.
دەزگا هەواڵگرییەکانی ئۆکرانیا ڕایانگەیاندووە، سەرجەم پارچە و بەشە گرانبەهاکانی ئامێرە جەنگییەکان براون و زۆربەی تانکەکانی فیرقەی 4ی سوپا، تەنانەت مەکینەشیان تێدانەماوە.
بەپێی کیێڤ، ڕوسیا بەم هۆیەوە 582 تانک و 1664 زرێپۆش و 294 دۆشکە و 93 سیستمی هەڵدانی موشەکی لەدەستداوە.
ئاماژەش بەوە دراوە، گەندەڵی گاریگەرییەکی خراپی لەسەر تواناکانی ئەو هێزە هەیە کە لە بێلاڕوسیا جێگیرکراون و کار گەیشتووەتە ئەوەی چەک و شتومەکی سەربازی بە خواردنەوە کحولییەکان بگۆڕنەوە.
