بەڕێوەبەری گشتیی ڕۆشنبیری و هونەری سلێمانی ڕایدەگەیەنێت، تائێستا فەرمانبەرەكانیان مووچەی مانگی دوویان وەرنەگرتووە، بەڕێوەبەری خانەنشینیی پێشمەرگە لە سلێمانی دەڵێت، “لە سبەینێوە دەست بە دابەشكردنی مووچە دەكرێتەوە”.
موحسین ئەدیب، بەڕێوەبەری گشتیی ڕۆشنبیری و هونەری سلێمانی لە لێدوانێكدا بە تۆڕی میدیایی ئێستای ڕاگەیاند، “فەرمانبەرەكانمان تا ئێستا مووچەی مانگی شوباتیان وەرنەگرتووە و بەشێكی زۆری فەرمانبەرانی وەزارەتەكانی دیكە لە سلێمانی مووچەیان وەرنەگرتووە و هۆكارەكەی نەبوونی پارە بووە لە بانكەكان كە لە دەسەڵاتی ئێمە نەبووە.”
هاوكات عەزیز عەلی فەتاح، بەڕێوەبەری خانەنشینیی پێشمەرگە لە سلێمانی لە لێدوانێكدا بە تۆڕی میدیایی ئێستای ڕاگەیاند، “بەهۆی پشووەكانی نەورۆزەوە تەنها یەك ڕۆژ مووچەی خانەنشینی دابەشكراوە و بڕیارە لە سبەینێوە دەست بە دابەشكردنی مووچەی مانگی شوباتی خانەنشینانی سەربازی و مەدەنی بكرێت ئەگەر پارەی پێویست لە بانكەكان هەبێت”.
ئاماژەی بەوە كرد، “ئەو فەرمانبەرانەی مووچەیان وەرنەگرتووە دابەشكردنی مووچەكانیان دەكەوێتە ڕۆژی یەكشەممە”.
