بەهۆی ڕووداوێکی تەقەکردنەوە لە یانەیەکی شەوانەی سلێمانی سێ کەس برینداربوون و کەسێکیش گیانیلەدەستدا.
سامان نادر، بەڕێوەبەری سەنتەری فریاکەوتنی خێرای سلێمانی بە تۆڕی میدیایی ئێستای ڕاگەیاند، ئەمشەو لە ئەنجامی ڕووداوێكی شەڕەتەقە لەیانەیەکی شەوانە لە شەقامی بازنەیی مەلیک مەحموود سێ كەس برینداربوون و كەسێكیش گیانیلەدەستدا.
وتیشی، بریندارەكان گەیەندراونەتە نەخۆشخانەی شار.
ڕوونیشیكردەوە، سەرجەم بریندارەکان و کوژراوەکەش بە فیشەک بووە.
هاوكات پەیامنێری ئێستا لە سلێمانی گواستیەوە، یانە شەوانەکە لە سەروو بەنزینخانەی بیناییە، لە نزیک بەڕێوەبەرایەتیی پۆلیسی سلێمانی و تا ئێستاش لێكۆڵینەوە و بەدواداچون لەسەر ڕووداوەكە بەردەوامە.
