چەند مووشەكێك ئاراستەی بنكەی ئاسمانیی بەلەد كران و دەنگی تەقینەوەی بەهێز بیستراوە.
كەمێك لەمەوبەر بنكەی ئاسمانیی بەلەد مووشەكبارانكرا و بەپێی زانیارییەكان، چوار مووشەك ئاراستەی بنكەكە كراون.
لیوا ڕوكن زیا موحسین سەعد، فەرماندەی بنكەی ئاسمانیی بەلەد ڕایگەیاند، هەر چوار مووشەكەكە لە شوێنی كراوەدا كەوتوونەتە خوارەوە و زیانیان بە بنكەكە و ستاف و كارمەندانی نەگەیاندووە.
مووشەكبارانكردنی بنكەی ئاسمانیی بەلەد دوای ئەوە دێت، كاتژمێر یەكی بەرەبەیانی ڕۆژی یەكشەممەی ڕابردوو، لەڕێگەی مووشەكەوە هێرشکرایەسەر شاری هەولێر و ژمارەیەك لە مووشەکەکان بەر ناوچەی نیشتەجێبوون کەوتن.
دواتر سوپای پاسدارانی ئێران بەرپرسیارێتیی خۆی لە ئەنجامدانی مووشەكبارانكردنەكە ڕاگەیاند و ئاماژەی بۆ ئەوە كرد كە بارەگای ئیسرائیلیی مووشەكبارانكردووە، حكومەت و لایەنە پەیوەندیدارەكانی هەرێمی كوردستانیش ئەوە ڕەتدەكەنەوە و داوا لە حكومەتی عێراق و كۆمەڵی نێودەوڵەتی دەكەن لێكۆڵینەوە لەو بارەیەوە بكەن.
