بۆ ماوەی دوو ڕۆژ سەرجەم پزیشکان و ئەوانەی لە کەرتی تەندروستیی تورکیا کاردەکەن مانگرتنیان لەکارەکانیان ڕاگەیاند، مانگرتنەکە دوێنێ دووشەممە 14ی ئازار کە ڕۆژی پزیشکانی تورکیایە دەستیپێکرد و تاوەکو ئێوارەی ئەمڕۆش بەردەوامبوو، داواکاری پزیسکان باشکردنی مووچە و باری داراییان بوو.
پزیشکان و کارمەندانی تەندروستی لەسەرتاسەری 81 پارێزگای تورکیا مانگرتنیان لەکار ڕاگەیاند و ماوەی دوو ڕۆژ لەسەر شەقامەکان مانەوە، لەناویاندا گەورە شارەکانی وەک ئیستانبول، ئەنقەرەی پایتەخت، مێرسین و دیاربەکر، لەسەر لافیتەکانیان دروشمی “شەرمەزاربە ئەردۆغان” نوسرابوو، ئەمەش لەوەڵامی لێدوانێکی ئەرۆغان لەڕۆژی تایبەت بە پزیشکاندا و بە پزیشکان دەڵێت، “ئەگەر دەتانەوێت وڵات بەجێبهێڵن و بڕۆنە دەرەوەی وڵات بڕۆن، ئێمە پزیشکی دیکە دادەنێین لەشوێنی ئەوانەی دەڕۆن”، هەرچەندە ئێوارە ڕۆژی دووشەممە لەو لێدوانەی پاشگەزبووەوە بەڵام مانگرتنەکە بەردەوامبوو.
پزیشکان و کارمەندانی تەندروستی ڕەخنەی ئەوەیان لە دەسەڵات گرت، لەگەڵئەوەی ئەردۆغان بڕیاریدا کە بەچەند هەنگاوێک چارەسەری کێسەی کەرتی تەندروستی و داواکاریی پزیشکان بکات بەڵام هیچ هەنگاوێکی کردەیی لەوبارەیەوە نەنراوە.
پزیشکان و کارمەندانی تەندروستی بەگشتی لەسەرتاسەری تورکیا بۆ ماوەی دوو ڕۆژ مانیانگرت لەکارکردن، لەگەڵئەوەشدا بەشی فریاکەوتنی خێرا، نەخۆشخانەکانی شێرپەنجە و کۆرۆنا لە کارکردن بەردەوامبوون، ئەم جۆرە مانگرتنە سەرتاسەرییەی پزیشکان دووەم جاریەتی لەمساڵدا.
پزیشکان داوادەکەن مووچەکانیان بەڕێژەی 150% زیادبکرێت، ئەمەش دوای بەرزبوونەوەی ڕێژەی هەڵاوسان لەو وڵاتە بە ئاستێکی بەرز و لە مانگی کانونی دووەمدا گەیشتە 54.4%، هەروەها بەهای لیرە بەڕێژەیەکی زۆر دابەزی.
