بەشێک لە مامۆستایانی وانەبێژ بۆ خستنەڕووی داواکارییەکانیان ناڕەزایی بەرامبەر پێنەدانی شایستەکانیان گردبوونەوەیان ئەنجامدا و ڕایانگەیاند، “سەرەڕای بەدەمەوە نەهاتنی حکومەت بۆ داواکارییەکانمان تائێستا شایستەکانی ساڵی 2021یشمان پێنەدراوە”.
مامۆستایانی وانەبێژ ئاماژە بەوەدەکەن کە لە زۆرینەی پەروەردەکانی هەرێمی کوردستان دەستیان بە خۆپیشاندان کردووە بۆ خستنەڕووی داواکارییەکانیان.
داواکارییەکانی مامۆستایانی وانەبێژ بریتیین لە، دامەزراندنی مامۆستایانی وانەبێژ بەبێ جیاوازی، پێدانی شایستەکانی مامۆستایانی وانەبێژ لەکاتی خۆیدا و لەگەڵ مامۆستایانی میلاک.
مامۆستایانی وانەبێژ ڕایانگەیاند، ئەگەر حکومەت وەڵامی داواکارییەکانیان نەداتەوە سەرجەم نوێنەرەکانیان لە پەروەردەکانی هەرێمی کوردستان ئاگاداری مامۆستایانی وانەبێژ دەکەنەوە بۆ دەستکردن بە بایکۆت و خۆپیشاندان.
