لە عێراق قەرزی 15 ملیۆن دیناری دەدرێت بە هاوڵاتییان و ماوەی دانەوەی قەرزی 50 ملیۆن دینارییش لە 10 ساڵەوە بۆ 15 ساڵ درێژكرایەوە.
هەردوو بانكی ڕەشید و ڕافیدەین لێدوانیان بۆ میدیای عێراقی داوە و ڕایانگەیاندووە، ماوەی دانەوەی قەرزی 50 ملیۆن دیناری كە بەمەبەستی دروستكردنی خانوو یاخود نۆژەنكردنەوەی دەدرێت بە فەرمانبەران و خانەنشینان و هاوڵاتییان، لە 10 ساڵەوە بۆ 15 ساڵ درێژكرایەوە.
ڕۆژی نۆی مانگی شوباتی ڕابردوو، بانكی ڕافیدەین كە بانكێكی حكومیی عێراقییە، بڕیاریدا پێدانی قەرز و پێشینە بە هاوڵاتییان و فەرمانبەران دەستپێبكاتەوە، قەرزەكان بریتین لە قەرزی پێنج ملیۆن دیناری، 10 ملیۆن دیناری، 50 ملیۆن دیناری و 100 ملیۆن دیناری.
هەردوو بانكەكە دەڵێن، ئاسانكاری دەكەن بۆ دانی قەرزی 15 ملیۆن دیناری بە هاوڵاتییان بەمەبەستی ئەنجامدانی پڕۆژەی كاركردن، لەگەڵ سوودمەندبوونیان لە قەرزی 50 ملیۆن دیناری بۆ دروستكردن و نۆژەنكردنەوەی خانوو بەبێ ئەوەی فەرمانبەر یاخود خانەنشین یان كارمەندی هێزە ئەمنییەكان بن، بەڵام ئێستا ئەو قەرزە نایانگرێتەوە.
