چەند لایەنێكی سوننی چوونەپاڵ هاوپەیمانیی عەزم بەسەرۆكایەتیی خەمیس خەنجەر و هاوپەیمانێتییەكی نوێیان پێكهێنا.
هاوپەیمانێتییەكە كە ناوی “عەزم”ـە، هەریەك لە هاوپەیمانیی عەزم و پارتی جەماهیر و پارتی حەسم و پارتی عەقد و هاوپەیمانیی عەرەبی لە كەركوك لەخۆدەگرێت و پێكەوە 35 كورسیی پەرلەمانییان هەیە.
سالم عیساوی وتەبێژی هاوپەیمانێتییەكە لە كۆنگرەیەكی ڕۆژنامەوانیدا لە بەغداد ڕایگەیاند، “خەمیس خەنجەر سەرۆكی هاوپەیمانیی عەزم بڕیاری یەكەم و كۆتایی دەدات لە دانوستاندنە سیاسییەكاندا”.
لە كۆنگرەكەدا خەمیس خەنجەر سەرۆكی هاوپەیمانێتییەكە وتی، “بەردەوامی دەدەین بەم پڕۆژە سیاسییە بۆ بەرەوپێشبردنی پرۆسەی سیاسی و سازدانی یەكەم كۆبوونەوەی پەرلەمان”.
لای خۆیەوە ئەحمەد عەبدوڵڵا جبوری سەرۆكی پارتی “جەماهیر” ڕایگەیاند، خەڵك زۆر شتیان پێویستە و دەبێت بەپەلە حكومەت پێكبهێنرێت.
ڕاكان جبوری پارێزگاری كەركوك لە كۆنگرە ڕۆژنامەوانییەكەدا بەشداریكرد و وتی، “پێویستیمان بە پشتیوانیی هاوپەیمانێتییەكەیە لە دۆزی كەركوك دا”.
