وەزارەتی نەوت ئاماری سەرەتایی بڕی نەوتی خاوی هەناردەكراو و داهاتی فرۆشی بۆ مانگی ڕابردوو بڵاوكردەوە.
وەزارەتەكە لە ڕاگەیەندراوێكدا ئاشكرایكرد، كۆی هەناردە و داهاتی بەدەستهاتووی مانگی شوباتی ڕابردوو، بەپێی ئامارە سەرەتاییەكان كە لە كۆمپانیای بەبازاڕكردنی نەوتی عێراق دەرچووە گەیشتووەتە هەناردەی 92 ملیۆن و 790 هەزار و 173 بەرمیل نەوت بە بڕی داهاتی 8.54 ملیار دۆلار.
دەشڵێت، بڕی هەناردەی نەوت لە ناوەڕاست و باشووری عێراقەوە گەیشتووەتە 91 ملیۆن و 314 هەزار و 828 بەرمیل، لەڕێی كێڵگەكانی كەركوكیشەوە بەرەو بەندەری جەیهان گەیشتووە ملیۆنێك و 475 هەزار و 345 بەرمیل.
وەزارەتی نەوت ڕوونیشیكردەوە، بڕی هەناردەی ڕۆژانە گەیشتووەتە سێ ملیۆن و 314 هەزار بەرمیلی ڕۆژانە، تێكڕای نرخی بەرمیلێك نەوت گەیشتووەتە زیاتر لە 92.083 دۆلار.
