له‌گه‌ڵ ئەوەی واده‌ی هه‌ڵبژاردنى په‌رله‌مانى كوردستان له‌لایه‌ن سه‌رۆكى هه‌رێمه‌وه دیاریكراوه، به‌ڵام تائێستا یاسای هه‌ڵبژاردنه‌كان هه‌موارنه‌كراوه‌ته‌وه و كێشه‌كانى كۆمسیۆن چاره‌سه‌رنه‌كراون، بۆیە به‌شێك له لایه‌نه‌كان له‌گه‌ڵ ئەوە نین هەڵبژاردن بەمشێوەیە ئەنجامبدرێت.
”كۆمسیۆن ماوه‌ی به‌سه‌رچووه و ناتوانێت هه‌ڵبژاردن ئه‌نجام بدات”
یه‌كێتیى نیشتمانیی كوردستان، تێبینى له‌باره‌ى به‌ڕێوه‌چوونى هه‌ڵبژاردن بەبێ هەمواركردنەوەی یاسای هەڵبژاردن و كاراكردنەوەی كۆمسیۆن هه‌یه، سوورە لەسەر هەمواركردنەوەی یاساكە.
له‌و باره‌یه‌وه ڕزگار حاجى حه‌مه ئه‌ندامى مه‌كته‌بی سیاسیی یه‌كێتى و به‌رپرسی مه‌كته‌بی هه‌ڵبژاردنى ئه‌و حزبه به تۆڕی میدیایی ئێستاى ڕاگه‌یاند، “کۆمسیۆنی هەڵبژاردنی هەرێمی کوردستان ماوەى بەسەرچووه و ناتوانێت هەڵبژاردنی په‌رله‌مانى كوردستان ئەنجام بدات”، پێیوایە چارەسەر ئەوەیە، ماوەکەیان بۆ درێژبکرێتەوە، یان کۆمسیۆنێکی نوێ دیاریبکرێت.
ئەمە جگە لەوەی یەكێتی سوورە لەسەر ئەوەی یاسای هەڵبژاردن هەمواربكرێتەوە و بكرێتە فرەبازنەیی، (یەكێكی لەگەڵ چوار بازنەدایە)، لەو بارەیەوە پێشنیازی خۆیان داوە بە سەرۆكایەتیی پەرلەمانی كوردستان.
”زیاتر له ساڵێكه داواى هه‌مواركردنه‌وه‌ى یاسای هه‌ڵبژاردنمان كردووه”
بزوتنه‌وه‌ى گۆڕانیش له‌باره‌ى به‌ڕێوه‌چوونى هه‌ڵبژاردنه‌وه گله‌یی و گازەنده‌ى هه‌یه و ده‌ڵێت، “ماوه‌ى زیاتر له ساڵ و نیوێكه داوامانكردووه یاسای هەڵبژاردن هه‌مواربكرێته‌وه”.
گوڵستان سه‌عید، سه‌رۆكى فراكسیۆنى گۆڕان له په‌رله‌مانى كوردستان به تۆڕی میدیایی ئێستاى ڕاگه‌یاند، “ماوه‌ى زیاتر له ساڵ و نیوێكه داوامان له سه‌رۆكایه‌تیی په‌رله‌مانى كوردستان كردووه، ئه‌و كۆمسیۆنه به‌هۆی ئه‌وه‌ى ماوه‌ى یاسایی به‌سه‌رچووه، چاره‌سه‌رێكى یاسایی بۆ بكرێت، به‌ڵام ئه‌و گرفته تائێستا چاره‌سه‌رنه‌كراوه و وه‌كو خۆی ماوه‌ته‌وه”.
لەبارەی یاسای هه‌ڵبژاردنیشەوە، سەرۆك فراكسیۆنەكەی گۆڕان ده‌ڵێت، “به‌هۆی ئه‌وه‌ى كه‌موكورتى له یاساكه‌دا هه‌یه، له ساڵى 2021ــه‌وه هه‌موارێكى پێشنیازكراومان پێشكه‌شی په‌رله‌مانى كوردستان كردووه، به‌ڵام تائێستا نه‌خراوه‌ته به‌رنامه‌ى كارى دانیشتنه‌كانى په‌رله‌مانه‌وه”.
بۆیە سه‌رۆكى فراكسیۆنى گۆڕان لەگەڵ ئەوەی سەرۆكی هەرێم كاتی هەڵبژاردنی دیاریكردووە، دووپاتیكردەوە، بزوتنەوەكە لەگەڵ ئەوەیە چاره‌سه‌رێكى یاسایی بۆ كۆمسیۆن بدۆزرێته‌وه، “كه‌موكورتى له كۆمسیاران هه‌یه و ده‌بێت پڕبكرێنه‌وه، یان ده‌سه‌ڵات بدرێته هه‌ر هێزێكى سیاسی كه بتوانێت كۆمسیاره‌كه‌ى ئاڵوگۆڕ بكات، كه ئه‌ویش كۆده‌نگیی سیاسیی پێویسته”.
”له‌هه‌مووى گرنگتر هه‌مواركردنه‌وه‌ى یاساى هه‌ڵبژاردنه، چونكه ئه‌گه‌ر یاساكه نوێنه‌كه‌ینه‌وه كۆمسیۆنمان بۆچیه؟”، گوڵستان سه‌عید واده‌ڵێت.
پێشیوایە، ئه‌و كارانه (هەمواركردنەوەی یاسای هەڵبژاردن و كاراكردنەوەی كۆمسیۆن) پێویستی به سازانى لایه‌نه سیاسییه‌كانه، چونكه ڕه‌هه‌ندى نیشتمانییان هه‌یه.
سەرۆكی فراكسیۆنەكەی گۆڕان پێیوایە، “جگە لە یاسای هەڵبژاردن، تۆمارى ده‌نگده‌رانیش كه‌موكوڕیی زۆره، بۆیه ده‌مانه‌وێت تۆمارى ده‌نگداران ببێته بایۆمه‌ترییه‌كه‌ى عێراق و هه‌وڵیش بده‌ین جۆری بازنه‌كانی هەڵبژاردن به‌شێوه‌یه‌كى دیكه بێت”.
ئەمە جگە لەوەی پێیوایە، به‌هۆی ئه‌وه‌ى كۆمسیۆنی هەڵبژاردن ماوه‌كه‌ى به‌سه‌رچووه، ناتوانێت سه‌روكارى هه‌ڵبژاردن بكات، چونكه هیچ ده‌سه‌ڵاتێكى نییه و ده‌بێت چاره‌سه‌رێكى یاسایی بۆ بكرێت.
