سەرۆكی ئۆكرانیا نیازی ڕوسیای بۆ داگیركردنی شاری چێرنۆبڵ ڕاگەیاند، هەوڵێكی لەو شێوەیەشی بە ڕاگەیاندنی جەنگ دژی هەموو ئەوروپا ناوبرد.
ڕوسیا بەردەوامە لە پێشڕەویی سەربازی لە خاكی ئۆكرانیادا، لە خۆرهەڵات، باكوور و باشووری ئۆكرانیاوە لە پێشڕەوی و هێرشدایە.
پێشتر بۆچوونەكان بەرەو ئەوە بوون، كە ڕوسیا تەنها دەچێتە ئەو ناوچانەی خۆرهەڵاتی ئۆكرانیا، كە دانیشتووانەكەی بە زمانی ڕوسی دەدوێن و مەیلیان بەلای مۆسكۆدایە، بەڵام پێدەچێت نیازی ڕوسیا بۆ پەلهاویشتن بەرفراوانتر بێت.
كەمێك لەمەوپێش ڤۆلۆدیمێر زیلینسكی سەرۆكی ئۆكرانیا دووبارە پەیامی دا، ڕایگەیاند، ڕوسیا دەیەوێت شاری چێرنۆبڵ داگیربكات.
زیلینسكی پێیوایە، هەنگاوێكی لەو شێوەیە ڕاگەیاندنی جەنگە دژی هەموو ئەوروپا.
پێشتریش سەرۆكی ئۆكرانیا زیاتر لە جارێك دووپاتیكردبووەوە، هەر پێشڕەوییەكی ڕوسی بۆسەر خۆرهەڵاتی ئۆكرانیا، تەواوی خۆرهەڵاتی ئەوروپا دەخاتە مەترسییەوە.
