هەریەك لە دراوی ئەلیكترۆنیی (بیتكۆین) و دراوی ڕوسی دابەزینیان بەخۆوە بینی، بەهای بەشێك لە كۆمپانیا ڕوسییەكانیش ڕوویان لە دابەزین كرد، لە بەرامبەریشدا نرخی نەوت و زێر لە بازاڕەكاندا بەرزبوونەوە.
بەهای دراوی (بیتكۆین)ی ئەلیكترۆنی ناسراو لە جیهاندا ئەمڕۆ بەڕێژەی 10% دابەزینی بەخۆیەوە بینی و لە خوار 35 هەزار دۆلارەوە مامەڵەی پێوەكرا، ئەمەش یەكەمجارە لەدوای كۆتایی كانونی دووەمی ڕابردووەوە.
دابەزینەكە بەهۆی ئەو هێرشانەوەیە كە بەرەبەیانی ئەمڕۆ لەلایەن سوپای ڕوسیاوە بۆسەر ئۆكرانیا دەستیپێكردووە.
هەر ئەمڕۆ بەهای ڕۆبڵ-ی دراوی فەرمی ڕوسی گەیشتە نزمترین ئاست لە بەرامبەر هەریەك لە دۆلار و یۆرۆ.
دراوەكە بە ڕێژەی 8% بەرامبەر دۆلار دابەزی و گەیشتە 87.55، پێشتر كەمترین بەهای پێوانەیی تۆماركرد لە 89.60. هەروەك بەڕێژەی 6.3% بەرامبەر یۆرۆ دابەزی و بە 97.51 مامەڵەی پێوەكرا.
لای خۆیەوە بانكی ناوەندیی ڕوسیا ڕایگەیاند، ڕێوشوێن دەگرێتەبەر بۆ زامنكردنی سەقامگیریی ڕۆبڵ و بازارەكان.
لەسەر ئاستی ڕوسیا بەهای پشكی كۆمپانیاكانی ڕوسیا، بەتایبەت كۆمپانیاكانی بواری وزە كەمبوونەوە. بەتەنها پشكی كۆمپانیای گازپرۆم زیاتر لە 50%ی بەهاكەی لەدەستدا، كۆمپانیای ڕوسنەفت-ی سەر بە حكومەتیش 60%ی بەهاكەی لێبووەوە.
لە بەرامبەردا نرخی نەوت لە بازاڕەكاندا بەرزبوونەوەیەكی بەرچاوی بەخۆیەوە بینی و نرخی نەوتی خاوی برێنت گەیشتە نزیكەی 105 دۆلار بۆ هەر بەرمیلێك.
هاوكات نرخی هەر ئۆنسێك زێر بۆ هەزار و 969 دۆلار بەرزبووەوە.
