بەڕێوەبەرایەتیی گشتیی تەندروستیی سلێمانی بڕیاری قەدەغەکردنی نەشتەرگەری لە نەخۆشخانە تایبەتەکان و بەتایبەت نەشتەرگەریی “منداڵبوون” دا، بەهۆی ئەوەی ئەمڕۆ بەروارێکی پەسەندکراوە لای خەڵک و ژمارەیەکی زۆر هەوڵدەدەن نەشتەرگەرییەکانیان بخەنە ئەو بەروارەوە وەک پیشتر لە بەروارە هاوشێوەکاندا ڕوویانداوە.
بەپێی نوسراوێک کە بەڕێوەبەری پشکنین و بەدواداچوون و دڵنیایی جۆریی سەربە بەڕێوەبەرایەتیی گشتیی تەندروستیی سلێمانی نیان حەمە ئەمین واژوویکردووە، ئاگاداری سەرجەم نەخۆشخانە تایبەتەکان دەکات کە لە دەوامی بەیانیانی ئەمڕۆ بەرواری 22/2/2022 هیچ جۆرە نەشتەرگەرییەک بەتایبەت نەشتەرگەریی “منداڵبوون” ئەنجامنەدەن.
بڕیارەکە جیاکاری کردووە بۆ پزیشکانی نەشتەرگەریی خانەنشین و پزیشکانی بێهۆشکاری خانەنشین.
لە نوسراوەکەدا هاتووە، “هەر نەخۆشخانەیەک سەرپێچی بکات بۆ ماوەی 72 کاتژمێر هۆڵی نەشتەرگەریی نەخۆشخانەکە دادەخرێت”.
