وەزارەتی کارەبا ئاشکرایکرد، بەهۆی دزینی پارچەکانی تاوەرەکانی کارەبا لە دێگەڵە، ئەو تۆڕە بەرگەی ڕەشەبای نەگرتووە و بەشێک لە تۆڕەکە کەوتووە.
وەزارەتی کارەبا لە ڕوونکردنەوەیەکدا دەڵێت، ” دزینی پارچە ئاسنەکانی تاوەرەکانی کارەبا دیاردەیەکی دزێوی دژی خزمەتگوزاریی گشتییە، هەندێک لە تاوەرەکانی کارەبا لە دێگەڵە، بە هۆی لێکردنەوەی پارچە ئاسنەکانییەوە، بەرگەی ڕەشەبایان نەگرتووە و کەوتوونەتە خوارەوە”.
ئاماژە بەوەشکراوە، ” تیمەکانی کارەبای هەولێر سەرقاڵی چارەسەرکردنی کێشەکەن و سکاڵا لەسەر ئەو کەسانەش تۆمار دەکرێت کە پارچە ئاسنەکانی تاوەرەکانی کارەبایان دزیوە”.
لەماوە چەند ساڵی ڕابردوودا ئەوە سێیەمین حاڵەتی دزینی تاوەرەکانی کارەبایە لە هەرێم و ساڵی 2016ش هەندێک بەتۆمەتی دزینی پارچەکانی تاوەری کارەبا سزادران.
