ڕێکخراوێکی مافی مرۆڤ لە پۆڵەندا، بەدواداچوونێکی بۆ دۆخی ئەو پەنابەرانە کردووە کە لە لێشاوی کۆچ لە بیلاڕوسیاوە گەیشتوون، دەرکەوتووە ئەو پەنابەرانەی داوای مافی مانەوەیان کردووە لە پۆڵەندا لە کامپێکی سەربازیدان.
بەدواداچوونەکە ئاشکرایدەکات، “لە کۆتا لێشاودا لە بیلاڕوسیاوە، سەدان پەنابەری ئەفغانی و عێراقی و سوری داوای مافی مانەوەیان لە پۆڵەندا کردووە و دواتر لە کامپێکی سەربازی دانراون، کە ژمارەیان هەزار و 600 کەسە و زۆرینەیان ژن و منداڵن”.
سەرەڕای ڕەخنەگرتن لە حکومەتی پۆڵەندا بەرامبەر مامەڵەیان لەگەڵ پەنابەران، ڕێکخراوەکە ڕایگەیاندووە، “هەر پەنابەرێک دوو مەتر چوارگۆشەی هەیە بۆ ژیانی ڕۆژانە و پەنابەران تەنها دەتوانن بچنە حەوشەی کامپەکەوە و ناتوانن دەرەوە ببینن”.
تا ئێستا سەدان کۆچبەری کورد لە وڵاتانی بیلاڕوسیا و پۆڵەندا و لیتوانیا ماونەتەوە، هەندێک لەو کۆچبەرانە وەک پەنابەر خۆیان لە وڵاتانی پۆڵەندا و لیتوانیا ناونووسکردووە، بەڵام بەهۆی گوومانی پۆڵەندا لە پەنابەربوونی ئەو کەسانە، بەهۆی سیاسەتی بیلاڕوسیاوە، پەنابەران لە دۆخێکی چاودێریی قورسدا دەژین.
