ئەنجومەنی باڵای دادوەریی عێراق سەرکۆنەی تیرۆرکردنی دادوەر ئەحمەد ساعدی دەکات لە پارێزگای میسان، بەرپرسیارێتیی ڕووداوەکەش دەخاتە ئەستۆی هێزە ئەمنییەکان، بەوەی کەمتەرخەم بوون لە ئەرکەکانیاندا.
لە ڕاگەیەندراوێکدا ئەنجومەنی باڵای دادوەریی عێراق ڕایگەیاند، “بەتوندی سەرکۆنەی تیرۆرکردنی دادوەر ئەحمەد فەیسەڵ ساعدی دەکەین و ڕەتیدەکەینەوە، کە لەلایەن چەتەکانی دەرەوەی یاساوە ئەنجامدارا”.
ئەنجومەنی دادوەریی سەرجەم بەرپرسیاریەتییەکانی ڕووداوەكەش دەخاتە ئەستۆی هێزە ئەمنییەکان و فەرماندەیی ئۆپەراسیۆنە سەربازییەکانی پارێزگاکە، “بەهۆی کەمتەرخەمیی ڕوونیان لە بەجێگەیاندنی ئەرکەکانی سەرشانیان”.
ئەنجومەنەکە لیژنەیەکی تایبەتی دادوەری ڕادەسپێرێت بۆ لێکۆڵینەوە لە ڕووداوەکە بۆ دەستخستنی زانیاری سەبارەت بە کەمتەرخەمی لە گرتنەبەری ڕێکاری پێویست بۆ پاراستنی ئاسایشی پارێزگاکە لەلایەن هێزە ئەمنییەکانەوە.
ئەنجومەنی دادوەری داوا لە مستەفا كازمی فەرماندەی گشتیی هێزە چەکدارەکان دەکات، پێداچوونەوە بكات بۆ فەرماندە و کەسایەتییەکانی بەرپرس لە ئاسایشی پارێزگای میسان و جێبەجێکردن و سەروەریی یاسا لەو پارێزگایە لەپێناو بەرژەوەندیی گشتی.
شەوی ڕابردوو لە پارێزگای میسان، ئەحمەد فەیسەڵ، كە دادوەر بووە و بە بەگژداچوونەوەی باند و بازرگانانی ماددەی هۆشبەر ناسرابوو و لێكۆڵینەوەی لە دۆسیەكانی تایبەت بەو پرسە دەكرد، لە ناوەڕاستی شاری عەمارەی ناوەندی پارێزگای میسان تیرۆركرا.
میدیای عێراقی دادوەرەكەی بە تایبەتمەند لە پرسەكانی ماددەی هۆشبەر و بەرەنگاربوونەوەی دیاردەكە وەسفكردووە، بۆیە تیرۆركردنەكە كاردانەوەی زۆری بەدوای خۆیدا هێنا.
بەشێك لە كاردانەوەكان لە میدیای عێراقیدا بە ئاراستەی ئەوە بوون، كە كەسانی دەستڕۆیشتوو و بەرپرسان لە پشت بازرگانیكردن بە ماددەی هۆشبەرەوەن و هەر ئەوانیش لەپشت تیرۆركردنەكەوەن، وەك ئەوەی لە میدیای عێراقیدا كاردانەوەكان گواستراوەتەوە.
