قوباد تاڵەبانی لەبارەی ڕووداوەکانی ئەمدواییەی حەسەکەوە لە ڕۆژئاوای کوردستان ڕایگەیاند، ڕێزێکی زۆری هەیە بۆ بەردەوامی گیانفیدایی هێزەکانی سوریای دیموکراتی لە ڕووبەڕووبوونەوەی هەوڵەکەی داعشدا.
لە نوسراوێکدا قوباد تاڵەبانی دەڵێت، ” تەقدیرێکی زۆرم ھەیە بۆ دواھەمین نەبەردی و گیانفیدایی ھێزەکانی سوریای دیموکرات لە شاری حەسەکەی ڕۆژئاوای کوردستان، کە توانییان تیرۆریستە داعشە ھەڵاتووەکانی گرتووخانەی غوێران دەستگیر بکەنەوە”.
تاڵەبانی ئاماژەی بەوەشکردووە، ” تیرۆریستانی داعش دەیانویست لە ڕێگەی دروستکردنی ڕووداوێکی ئاڵۆزەوە، ئارامیی ناوچەکە بشێوێنن و ڕیزەکانی خۆیان پتەو بکەنەوە”.
قوباد تاڵەبانی پەیامێکی ئاڕاستەی کەسوکاری شەهیدانی ئۆپەراسیۆنەکە کردووە و دەڵێت، ” ھاوخەمیی خۆمان بۆ کەسوکاری شەھیدانی ئۆپەراسیۆنەکە دەردەبڕین و ھیوای زوو چاکبوونەوەیش بۆ برینداران دەخوازین. ئەم ڕووداوە پێمان دە‌ڵێتە‌وە کە؛ داعش ھێشتا مەترسییەکی زیندووە و دەبێت لە ھەرێمی کوردستان و عێراقیش لێیان غافڵگیر نەبین و لە ئامادەباشیدا بین. ئەرکی ھەمووشمانە، بەرەنگاریان ببینەوە”.
ئەمڕۆ هەسەدە خۆڕادەستكردن و دەستگیركردنی 3 هەزار و 500 چەكداری داعشی ڕاگەیاند، لە زیندانی غوێران نزیكەی 60-90 چەكدار ماون تا ئێستا لە زیندانەكەدا خۆیان نەداوە بەدەستەوە.
هێزەكانی سوریای دیموكرات لە دوایین ڕاگەیەندراودا ئاشكرایكردووە، دوای ئەوەی زیندانی غوێران كۆنترۆڵكرا و نزیكەی 3 هەزار و 500 چەكداری داعش ناچار بە خۆڕادەستكردن كران، هێزەكانیان هەڵمەتێكی كێوماڵیان لەناو زیندانەكە دەستپێكرد.
