سەدەف كەباش ژنە میدیاكاری تورك بەتۆمەتی “سووكایەتیكردن بە سەرۆك” زیندانیدەكرێت.
هەینیی ڕابردوو لەكاتی پێشكەشكردنی پرۆگرامە تەلەڤیزیۆنییەكەیدا بەشێوەیەكی ڕاستەوخۆ لە كەناڵی “تیلی 1″ەوە، سەدەف كەباش ژنە میدیاكاری تورك پەندێكی بە نموونە هێنایەوە و ئەوەش بە سووكایەتیپێكردنی ڕاستەوخۆی ڕەجەب تەیب ئەردۆغان سەرۆك كۆماری توركیا لێكدرایەوە.
كەباش وتی، “پەندێكی زۆر باو هەیە دەڵێت، “ئەو سەرەی تاجی لەسەردەنرێت، داناتر دەبێت، بەڵام پێمانوایە ئەوە دروستنییە. گا بە چوونەناو كۆشك نابێتە پاشا، بەڵكو كۆشك دەبێتە تەویلە”.
دوای پرۆگرامەكە، پێشكەشكارەكە هەمان پەندی لە تویتەرەكەی خۆیەوە بڵاوكردەوە.
ئویگور بویراز پارێزەری سەدەف كەباش ئاشكرایكرد، ڕۆژی شەممە سەدەف لە ماڵەكەی خۆیدا لە ئیستانبول دەستبەسەركراوە و دواتر بڕیاردراوە وەك نیمچە دەستبەسەركراوێك مامەڵەی لەگەڵدا بكرێت تا ئەو تاكەی كەیسەكەی یەكلادەبێتەوە.
سووكایەتیكردن بە سەرۆك لە توركیا وەك “تاوان” مامەڵەی لەگەڵدا دەكرێت و سزاكەی ساڵێك بۆ چوار ساڵ زیندانیكردنە.
لە كاردانەوەی قسەكانی پێشكەشكارەكەدا، عەبدلحەمید گویل وەزیری دادی توركیا لە تویتەر نووسی، “نەفرەت لەو وشە قێزەونانە دەكەم كە دژی سەرۆك كراون”.
