لە داواکارییەکدا دانیشتووانی گوندی شەشۆی سنووری پارێزگای سلێمانی داوادەکەن قائیمقامییەتی قەزای ماوەت و پارێزگای سلێمانی بەهانای دانیشتووانی گوندەکەوە بچن کە بەهۆی بەفربارینی زۆرەوە ڕێگەیان لێگیراوە.
داواکارییەکە کە ئاراستەی هەریەکە لە پارێزگای سلێمانی و قائیمقامییەتی ماوەت کراوە، داوادەکەن بەزووترین کات بەهانای دانیشتووانی گوندی شەشۆ-وە بچن بۆ پاککردنەوەی ڕێگاکانی گوندەکە و چاککردنەوەی کارەبای گوندەکە.
دانیشتووانی گوندی شەشۆ ئاماژە بەوە دەکەن، بەهۆی بارینی بەفرێکی زۆرەوە ڕێگە لە دانیشتووانی گوندەکە گیراوە و دەستیان ناگات بەهیچ بنکەیەکی تەندروستی، داوادەکەن بەپەلە هاوکارییان بکەن.
دەشڵێن، بەهۆی بەفرەوە زیانێکی زۆر بە خەڵکی گوندەكە گەیشتووە و ئاژەڵێکی زۆر بەهۆی نەبوونی ئاو و کەمیی ئالیکەوە مرداربوونەتەوە.
