چوار ساڵ بەر لە ئێستا و لە ڕۆژێكی وەك ئەمڕۆدا، 1/20، هێزەكانی سوپای توركیا بە هاوكاریی گروپە چەكدارەكانی نزیكی ئەو وڵاتە هێرشی ئاسمانی و زەمینییان بۆسەر عەفرین دەستپێكرد، چوار ساڵ دوای ئەو هێرشانە، شارەكە بەدەست گۆڕینی دیمۆگرافیا، لەناوبردنی هاوڵاتییان و دارستانەكانەوە دەناڵێنێت.
شەڕ و ڕووبەڕووبوونەوەی سوپای توركیا و ئەو گروپانە و شەڕڤانانی كورد لە ڕۆژئاوای كوردستان، دوای دوو مانگ، بە داگیركردنی عەفرین كۆتاییهات.
لەو ماوەیەدا سوپای توركیا و گروپەكانی یاوەری چەندین هەوڵی گۆڕینی دیمۆگرافیا، ناچاركردنی هاوڵاتییانی ڕەسەن بە جێهێشتنی شوێنەكانیان لەڕێی ڕفاندن و كوشتنی هاوڵاتییانی مەدەنی و شێواندنی دارستان و ناوچە سەوزەكان ئەنجامداوە.
بەپێی ئامارێك، لە ماوەی چوار ساڵی ڕابردوودا 686 هاوڵاتیی مەدەنیی عەفرین كوژراون و هەشت هەزار و 455 هاوڵاتیش ڕفێندراون، نیوەی زیاتری ئەوانەی ڕفێندراون چارەنووسیان نادیارە.
پێشتر ئاژانسی هەواڵی فورات نیوز بەبۆنەی ڕۆژی جیهانیی مافی مرۆڤەوە بڵاویكردبووەوە، لەنێو ئەو 686 كوژراوەی عەفریندا، 88یان لەژێر ئەشكەنجەدا گیانیان لەدەستداوە.
هەروەها لانیکەم 96 ژن لەلایەن هێزە چەكدارەكانی هاوپەیمانیی توركیاوە کوژراون، لەوانە حەوتیان بەهۆی ئەشکەنجە و دەستدرێژیی سێكسییەوە خۆیان کوشتووە، ئەمە جگە لەوەی چەكدارە ئیسلامییە هاوپەیمانەكانی توركیا دەستدرێژییان کردووەتەسەر 71 ژن.
بەگوێرەی ڕاپۆرتی فورات نیوز، بەر لە داگیرکردنی عەفرین 96٪ی دانیشتووانەکەی کوردبوون، بەڵام ئێستا ڕێژەی کورد لەو شارە تەنها 23٪یـە، هاوکات لەکۆی 15 هەزار عەلەوی، تەنها 200 کەس و لە 25 هەزار ئێزدی، تەنها دوو هەزاریان لە عەفرین ماون.
ئێستا نزیكەی 75%ی دانیشتووانی عەفرین زۆرینەیەكی عەرەبی هاوردەكراو و كەمینەیەكی توركمانی هەوردەكراون، كورد بووەتە كەمینە لە شارەكەدا، ئێزدی و عەلەوییەكانیش نزیكن لە سڕینەوە.
سەبارەت بە دار و دارستانەكانی عەفرین، ئامارێك ئاشكرایدەكات كە تائێستا لەلایەن سەربازانی توركیا و گروپە چەكدارەكانەوە نزیكەی 400 هەزار دار سوتێندراون و سەدان هەزاریش بڕدراونەتەوە.
چەكدارەكان دوای بڕینەوەی دارەكان لە گوندەكانی وەك ساتیا و گۆزێ لە ناوچەی جندرێس، لە بازاڕەکانی عەفرین وەک داری خەڵوز دەیفرۆشن، بەشێك لەوانە ئەو دار زەیتوونانەن كە ناوچەكەیان پێدەناسرێتەوە.
توركیا و چەكدارە گرێدراوەكانی زیانی زۆریان بە باخەكانی زەیتوون لە عەفرین داوە، توركیا بەشێكی زۆری بەرهەمی زەیتوونی جوتیارانی كوردی عەفرین بۆ خۆی دەبات و بەكاریاندەهێنێت بۆ دروستكردنی ڕۆنی زەیتوون و بەرهەمەكانی دیكەی دروستكراو لە زەیتوون.
لەم چەند ساڵەی داگیركاریی توركیا بۆسەر عەفرین، توركیا ساڵانە بایی نزیكەی 50 ملیۆن دۆلار زەیتی زەیتوونی دزراوی عەفرینی بە ئەوروپا فرۆشتووە.
