وەزارەتی كشتوكاڵی هەرێم ڕایدەگەیەنێت، ئامێر و كەلوپەلی پێشكەوتووی كشتوكاڵی بەشێوەی قیستی درێژخایەن و بێ وەرگرتنی پێشەكی بۆ جوتیاران دابیندەكات.
وەزارەتەكە لە ئاگادارییەكدا بۆ جوتیاران ڕایگەیاندووە، پاش بڕیاری ژمارە (76)ی ئەنجومەنی وەزیران و ڕەزامەندی وەزارەتەكانی كشتوكاڵ، ناوخۆ و دارایی و ئابوری، بە هەماهەنگی کەرتی تایبەت هەڵدەستێ بە دابینکردنی (ئامێر و کەلوپەلە پێشکەوتووەکانی کشتوکاڵی) بەشێوەی قیستی درێژخایەن و بەبێ وەرگرتنی هیچ پێشەکیەک بۆ بەردەستبوونی ئامێرەكان بۆ جوتیاران.
ئامێر و كەلوپەلەكان بە نرخی گونجاو، بەلێخۆشبوونی گومرگی و بەخشینی تابلۆی کشتوکاڵی دەبێت وەك ئەوەی وەزارەتی كشتوكاڵ ئاماژەی پێداوە و بە “هەنگاوێکی گرنگ بۆ پاڵپشتی و ئاشنایەتی جوتیارانی ئازیزی هەرێمی کوردستان بە تەکنەلۆژیای نوێ لە بەرهەمهێنانی کشتوکاڵی” ناویدەبات.
داواش لەو جوتیارانە دەكات كە خوازیاری وەرگرتنی ئامێر و کەلوپەلی کشتوکاڵین، بەمەبەستی تۆمارکردنی ناویان و پێدانی زانیاری لەسەر جۆری ئامێر و کەلوپەلەکان و پرکردنەوەی فۆرم، لە ڕێكەوتی 2022/1/23 سەردانی بەرێوەبەرایەتیی گشتیی کشتوکاڵی پارێزگاکان و ئیدارە سەربەخۆکان بکەن.
