نەتەوە یەكگرتووەكان: عێراق یەكەمین وڵاتە لەڕووی پیسبوون بە مین

شەڕی داعش و جەنگەكانی ڕابردوو هۆكارن

كاربەدەستێكی نەتەوە یەكگرتووەكان لە عێراق ڕایدەگەیەنێت، داعش ژمارەیەكی زۆری مین و پاشماوەی جەنگی لەناوچەكانی ژێر دەسەڵاتی جێهێشتووە و دەشڵێت، عێراق یەكەمین وڵاتە لەڕووی ژمارەی مین و ئەڵغامەوە.

بیر لۆدهاس، كاربەدەستی ڕێكخراوی نەتەوە یەكگرتووەكان تایبەت بە كاروباری مین لە لێدوانێكی ڕۆژنامەوانیدا ڕایگەیاند، چەكدارانی داعش پیسبوونێكی دژواریان لە ناوچە ئازادكراوەكاندا جێهێشتووە، قەبارەی مین و پاشماوەكانی جەنگ لە ئێستادا گەورەترە لەو توانایەی لە بەردەستدایە.

ئەوەشی وت، “ململانێكانی ڕابردووش سەرچاوەی زیادبوونی ئەڵغام و پاشماوەكانی جەنگن كە زۆرینەیان لە هێڵی سنووریی نێوان عێراق و كوەیتدایە، پیسبوونێكی تر بەهۆی مادە تەقێنەرەكانی بۆمبە چێنراوەكانە، هەموو ئەمانە هۆكارە بۆ پێكهێنانی فەرمانگەی نەتەوە یەكگرتووەكان بۆ كاروباری پەیوەندیدار بە مین لە عێراق بەمەبەستی پشتیوانی حكومەتی بەغداد و گێڕانی ڕۆڵی هەماهەنگی لەگەڵ لایەنە پەیوەندیدارەكاندا”.

بەرپرسەكەی نەتەوە یەكگرتووەكان دوپاتیشیكردوە، عێراق بەوە جیادەكرێتەوە كە یەكێكە لەو گەورە وڵاتانەی زۆرترین پیسبوونی بە مین و پاشماوەكانی جەنگ و بۆمبی چێندراو هەیە، ئەمەش پێویستی بە هەوڵێكی نێودەوڵەتی و سەرچاوە و هەوڵی تایبەت هەیە بۆ پاككردنەوەی وڵاتەكە لێی.

پێشتر عوبێد ئەحمەد، بەڕێوبەری گشتیی كاروباری هونەریی دەزگای مینی هەرێمی كوردستان بە تۆڕی میدیایی ئێستای وت، “شەڕی ئێران و عێراق وایكرد هەموو ناوچە سنوورییەكانی نێوان كوردستان و ئێران لە برادۆستەوە تا پشدەر و خانەقین كە مەیدانی جەنگەكە بوون، پاشماوەی جەنگیان لێبێت، كە خراپترینیان مینڕێژكردنی ئەو ناوچانە بوو”.

ئاماژەی بەوەشكرد، گەورەترین ڕێژەی پیسبوونی زەوی بە مین و تەقەمەنی لە هەرێمی كوردستان، دەگەڕێتەوە بۆ جەنگی نێوان ئێران و عێراق، ئاشكراشیكرد، “بەپێی داتاكانی ئێمە نزیكەی 700 كیلۆمەتری دووجا زەوی لە هەرێم بە مین پیسبوون، بە هەموو ئەو شەڕانەی لە هەرێمی كوردستان ڕویانداوە، بەڵام زۆربەی ئەو ڕێژەیەش دەگەڕێتەوە بۆ جەنگی عێراق-ئێران”.

بەگوێرەی ئامارەكانی دەزگای مین، لە هەرێمی كوردستان لە ئێستادا 220 كلیۆمەتر دووجا زەوی پیسبوو بە مین ماونەتەوە، كاری تیمەكانی ئەو دەزگایەش بۆ پاككردنەوەی ئەو ناوچانە بەردەوامییان هەیە.

بابەتی پێشتر

بایدن سیاسەتی ئەمریكا بەرامبەر هەرێم و عێراق دەگۆڕێت؟

بابەتی دواتر

ژمارەیەك لە گەورە بەرپرسانی پەنتاگۆن دەست لەكاردەكێشنەوە

بابەتی پەیوەندیدار
Total
0
Share