بەهۆی ئەو شەپۆلە بەفر و سەرمایەوە ڕووی لە پارێزگای سلێمانی کردووە، پارێزگار دەسەڵاتی داوەتە یەکە کارگێڕی و پەروەردەکان بۆ ڕاگەیاندنی پشوو.
هەڤاڵ ئەبوبەکر، پارێزگاری سلێمانی بە تۆڕی میدیایی ئێستای ڕاگەیاند، “دەسەڵات دراوەتە یەکە کارگێڕییەکان و پەروەردەی قەزا و ناحییەکان، بەپێی کەشوهەوای ناوچەکەی خۆیان پشوو ڕابگەیەنن، بۆ سەلامەتی گیانی خوێندکاران و کارمەندان”.
دڵشاد عومەر، بەڕێوەبەری گشتیی پەروەردەی سلێمانی بە تۆڕی میدیایی ئێستای ڕاگەیاند، ” بەهۆی ئەو شەپۆلە سەرمایەی پێشبینی كراوە، سبەی دوو شەممە 17ی 1ی 2022 لە باخچەی ساوایان و بازنەكانی یەكی بنەڕەتی، كە ( پۆلەكانی یەك و دوو و سێ ) دەگرێتەوە، دەکرێتە پشوو”.
هاوکات هاوار حەمید، بەڕێوەبەری پەروەردەی دەربەندیخان، بە تۆڕی میدیایی ئێستای ڕاگەیاند، ” پاش راوێژکردن لەگەڵ قائیمقامی قەزای دەربەندیخان، بەهۆی هاتنی شەپۆلی سەرما، پاراستنی تەندروستی مناڵان، بڕیارماندا بە ڕاگرتنی دەوامی باخچەکانی مناڵان و بازنەی یەکەمی قوتابخانەکان (یەکەم تا سێیەمی بنەڕەتی) بۆ سبەینێ دووشەممە”.
سەرۆکایەتی شارەوانی کەناروێ بە تۆڕی میدیایی ئێستای ڕاگەیاند، ” ئاگاداری شۆفێران و دانیشتوانی سنورەکەمان دەکەین کە لە ئێستادا بە هۆی بارینی بەفرەوە ڕێگای سەرەکەی چوارتا کەناروێ و کەناروێ سیوەیل گیراوە بۆ سەلامتی خۆتان بەکاری مەهێنن”.
