وتەبێژی کۆشکی سپی ڕایده‌گه‌یه‌نێت، هۆکاری بەرزبوونەوەی ئاستی توانا ئەتۆمییه‌كانى ئێران و خێراکردنی بەرنامە ئەتۆمییەکەی، به‌هۆی کشانەوەی دۆناڵد ترەمپ لە ڕێککەوتنی ئەتۆمی لەگەڵ ئەو وڵاتەدا بوو.
جین ساکی وتەبێژی کۆشکی سپی لە کۆنگرەیەکی ڕۆژنامەوانیدا ڕایگه‌یاند، کۆبوونەوە ئەتۆمییەکان لە ڤیەننا لەگەڵ ئێران درێژەیان هەیە و لە ئێستاشدا دانوستاندن بەردەوامە.
ساکی ڕەخنەی لە دۆناڵد ترەمپ سەرۆکی پشووی ئەمریکا گرت و وتی، لە ئێستادا توانا و هێزی ئەتۆمیی ئێران زیادیکردووە، لە هەموو جیهاندا جەنگی بریكارێتی دەکات، ئەگەر سەرۆکی پێشووی ئەمریکا (دۆناڵد ترەمپ) بێباکانە و بێبیرکردنەوە لە هەنگاوی دواتر لە ڕێککەوتنی ئەتۆمی نەکشایەتەوە، هیچ کام لەمانە ڕوویان نەدەدا”.
“بە کشانەوەی ترەمپ لە ڕێککەوتنی ئەتۆمی، ئیدی ئەمریکا چاودێریی کارە ئەتۆمییەكانی ئێرانی نەکرد”، وەك وته‌بێژه‌كه‌ى كۆشكى سپی ڕایگەیاند و جه‌ختیشیكرده‌وه، “ئیداره‌كه‌ى بایدن له ئێستادا هەوڵدەدات بۆ سەرلەنوێ بنیادنانەوەی ئەو پەیوەندییانە و دووبارە گەڕانەوە بۆسەر مێزی گفتوگۆ”.
