بهشى پۆلیسى دوكان باندێكى فیڵكردنیان دهستگیركرد كه ئۆتۆمبێلی خۆیان دهسووتاند و پارهیان له هاوڵاتییان كۆدهكردهوه .
له ڕاگهیهندراوێكدا بهڕێوهبهرایهتیی پۆلیسی سلێمانى بڵاویكردهوه، “دواى ئهوهى بنكهى پۆلیسى خهلهكان ئاگاداركرایهوه له بوونى ڕوداوێكى سووتانى ئۆتۆمبێل لهسهر ڕێگاى دوكان – ڕانیه، پاش چوونى هێزهكانى پۆلیسى دوكان و بهرگریى شارستانى بۆ شوێنى ڕوداوهكه، دهركهوت كه ئۆتۆمبێلێكى جۆرى میتسیوبوشى ژمارهى نهینهوا بهتهواوهتى سووتاوه”.
باسی لهوهش كردووه، شۆفێرهكهى بهناوێكى خوازراوهوه خۆى وهك پێشمهرگه ناساندووه و سێ كهسى تریش له شوێنى ڕووداوهكه بڕى 5 ملیۆن و 794 ههزار دینارى عێراقى و 320 دۆلار و 50 یۆرۆیان له ڕێبوارانى ئهو شهقامه بۆ شۆفێرى ئۆتۆمبێله سووتاوەكه كۆكردووەتهوه .
ههر بهپێی ڕاگهیهندراوهكه، بەھۆی گومانیان لە ڕووداوەکە، مهفرهزهكانى بنكهى پۆلیسى خهلهكان دهستبهجێ لێكۆڵینهوهى وردیان دهستیپێكرد و زانرا كه خاوهنى ئۆتۆمبێلهكه ناوى (م ، خ ، أ لهدایكبووى 1992) دانیشتووى قهزاى ئاكرێیه و پیشهى پێشمهرگه نییه و بهناوى پێشمهرگهوه ئهم كارهى كردووه و پۆشاكى پێشمهرگەى لهبهركردووه، ئهو كهسانهشى كه پارهكهیان بۆ كۆكردووەتهوه شهریكى تاوانهكهى بوون و ئۆتۆمبێلهكهش به نرخێكى ههرزان كڕیویانه و خۆیان سووتاندوویانه .
پۆلیسی سلێمانى ئاشكراشیكردووه، ئهو باندە چهند جارێك ئهو تاوانهیان ئهنجامداوه له “بهحركه، سهنگهسهر و چهند پارێزگایهكى تر و له كاتى لێكۆڵینهوهشدا دانیان ناوه به تاوانهكانیاندا”.
