لە درێژەی ناونانی گیاندار و زیندەوەرانی تازەدۆزراوەدا، زانایانی گیاناسی لە بەریتانیا جۆرێک گیایان ناونا “لیۆناردۆ دیکاپریۆ”، وەک چۆن پێشتر لە ئێران ماسییەک بەناوی عەلی داییەوە ناونرابوو.
بەپێی هەواڵێکی بی بی سی، زانایانی گیاناسیی بەریتانی، دوای دۆزینەوە و ئاشکراکردنی ئەو جۆرە گیایە، بەناوی لیۆناردۆ دیکاپریۆ-ی ئەستێرەی هۆڵیودەوە ناویانداوە، ئەوەش وەک ڕێزێک لەبەرامبەر هەوڵەکانی دیکاپریۆ لە بواری ژینگەدۆستی و ڕووبەڕووبوونەوەی بڕینی دارستانەکان بۆ بازرگانیی تەختە.
پێشتر دیکاپریۆ، بە پاڵپشتیی فۆڵۆوەرەکانی لە تۆڕە کۆمەڵایەتییەکان هەوڵێکی لە دژی بڕینەوەی دارستانەکان دەستپێکردبوو، هەوڵەکەش کاریگەریی ئەرێنیی لەسەر هێشتنەوەی پانتایی دارستانەکان هەبوو.
مانگی 11ی ساڵی ڕابردوو، دوای دۆزینەوەی جۆرێک ماسی لە ڕووباری “سەمیرە” لە پارێزگای کرماشان لە ڕۆژهەڵاتی کوردستان، لیژنەیەک لەسەر ئەوە ڕێککەوتن ماسییەکە ناوبنێن “عەلی دایی” یاریزانی پێشووی هەڵبژاردەی ئێران.
حامید موسەوی، سەرپەرشتیاری لیژنەی لێکۆڵینەوە لە ماسییەکە ئەوکات ڕایگەیاندبوو، “بەهۆی هەڵوێستی مرۆڤدۆستانەی یاریزان و ڕاهێنەری ئێرانی، عەلی دایی لە بوومەلەرزەکەی ساڵی 2018ی کرماشاندا، ئەو ماسییە بەناوی ئەو یاریزانە دێرینەوە ناونراوە”.
