میدیاکانی پەکەکە بڵاویانکردەوە، دوێنێ دووشەممە تەرمی چالاکوانێکی ڕۆژهەڵاتی کوردستان لەماڵەکەی خۆیدا دۆزراوەتەوە، کە ڕۆژی 31ی کانونی یەکەمی 2021 لەماڵەکەیدا کوژراوە.
میدیاکان ئاماژەیان بەوەکردووە، چالاکوانە كوژراوەکە ناوی ئەحمەد بێخەم بووە و خەڵکی ڕۆژھەڵاتی کوردستانە، دوای ئەوەی بەکوژراوی لە شوققەکەیدا لە شاری هەولێر دۆزراوەتەوە، شوێنەواری ئەشکەنجەدان بە جەستەیەوە بووە.
بنەماڵەی چالاکوانەکە کە قسەیان بۆ میدیاکانی پەکەکە کردووە ڕایانگەیاندووە، “لەم چەند ڕۆژەدا بەردەوام لەلایەن کەسوکارەکەیەوە پەیوەندیی پێوەکراوە، بەڵام وەڵامی نەداوەتەوە، دوای دوو ڕۆژ لەلایەن پۆلیسەوە پەیوەندی بە خێزانەکەیەوە کراوە و هەواڵی کوژرانیان پێڕاگەیەندوون”.
بەپێی ئەو میدیایانە، شوێنەواری ئەشکەنجەدان بەسەر جەستەی کوژراوەکەوە بووە، گوماندەکرێت لەژێر ئەشکەنجەدا گیانیلەدەستدابێت.
هێزە ئەمنییەکان بە کەسوکارەکەیان ڕاگەیاندووە، دوای 20 ڕۆژی دیکە وردەکاریی گیانلەدەستدانی ئەو چالاکوانەیان پێڕادەگەیەنن.
