درەنگانی شەوی ڕابردوو فڕۆکە جەنگییەکانی ئیسرائیل هێرشێکیان بۆسەر پێگەکانی بزوتنەوەی حەماس ئەنجامدا.
بەپێی سەرچاوە ناوخۆییەکان، فڕۆکەکانی ئیسرائیل پێگە سەربازییەکانی سەربە بزوتنەوەی حەماسیان بۆردومانکردووە، لەناویشیاندا پێگەی قادسیە.
بۆردومانەکە لە شاری خان یونسی باشووری کەرتی غەززە ئەنجامدراوە.
بەپێی سەرچاوەکان، فڕۆکەکانی ئیسرائیل بە 12 مووشەک پێگەکانی حەماسیان بۆردومان کردووە.
لەلایەکی دیکەوە کەناڵی 13ی عیبری ڕایگەیاند، بۆردومانی پێگەکانی حەماس وەڵامدانەوە بووە بۆ ئەو مووشەکانەی ئاراستەی دەروبەری تەلئەبیب کراون.
وتەبێژی سوپای ئیسرائیل جەختیکردوە، کە بۆردومانەکانیان تەنها پێگە سەربازییەکانی حەماسی لەو ناوچەیە گرتووەتەوە، ئەوەش دوای ئەوەی بەیانی دوێنێ هێرشی مووشەکییان بۆسەر کەناراوەکانی دەریای سپی لە تەلئەبیب ئەنجامداوە.
