جێگری سەرۆکی ئەنجومەنی وەزیران ڕایدەگەیەنێت، ئامانجمانە ئاسانتری بکەین بۆ هاوڵاتییان کە کۆمپانیای خۆیان دابمەزرێنن چونکە کەرتێکی تایبەتی بەهێز، بڕبڕەی پشتی ئابوورییەکی بەهێز و هەمەجۆرە لە هەرێمی کوردستان.
لە کۆبوونەوەکەدا، گفتوگۆ دەربارەی چۆنیەتی ئاسانکردنی کاروباری تۆماركردنی کۆمپانیاکان کرا، لەگەڵ ڕەخساندنی کەشێکی لەبار بۆ ئەوەی ببنە هۆکاری گەشکردن و بووژاندنەوەی ئابووری. بۆیە لە تەوەری یەکەمی كۆبوونەوەكەدا، پلانی كورتخایەن و درێژخایەن بۆ ئەو مەبەستە خرانەڕوو، کە چۆن پێداچوونەوە بە پڕۆسەکە بکرێت لە پێناو کەمکردنەوە و نەهێشتنى ئەو ئاڵۆزی و ڕۆتینەی ئێستا هەیە.
هەروەها باس لە پێداچوونەوە بە تۆماری کارگە و مافی بەکارهێنانی هێمای بازرگانی بیانی کرا، لەو بڕگەیەدا جێگری سەرۆکی ئەنجومەنی وەزیران و وەزیری پیشەسازی و بازرگانی جەختیانکردەوە، دەبێت حکومەت بەردەوام بێت لە چاکسازی و هەموو کارئاسانییەک بکات لەپێناو باشتر خزمەتکردنی هاوڵاتییان و پڕکردنەوەى ئەو کەلێنەی لە ئابوری کوردستاندا هەیە بە پشتیوانی کەرتی تایبەت.
ئەم هەنگاوانەی حکومەتی هەرێم مەبەست لێی کەمکردنەوەی ڕۆتینە لە پرۆسەی تۆماری كۆمپانیاكان و ئەو کەسانەی دەیانەوێت کۆمپانیای بچووک، مامناوەند و کۆمپانیای تاکەکەسی دابمەزرێنن زیاتر سوودی لێ ببینن.
ئەم هەنگاوانە بەشێکن لە بەرنامەی خزمەت کە بەسەرپەرشتی جێگری سەرۆکی حکومەت ئەنجامدەدرێت لە پێناو ئەوەی خزمەتەکانی حکومەت بەشێوەیەکی باشتر و خیراتر و بە تێچوویەکی گونجاوتر بگاتە هاوڵاتییان.
