ئەحمەد سەحاف وتەبێژی وەزارەتی دەرەوەی عێراق ڕایگەیاند، “110 كۆچبەر لە سنوورەكانی پۆڵەنداوە دەگەڕێندرێنەوە بۆ وڵات”.
ئەو كۆچبەرانە بەشێوەیەكی ئارەزوومەندانە دەگەڕێنەوە بۆ عێراق و باڵیۆزخانەی عێراق لە پۆڵەندا و وەزارەتی دەرەوە بەدواداچوونیان بۆ ئەو كەیسە كردووە، وتەبێژی وەزارەتی دەرەوەی عێراق وایوت.
سەحاف ڕاشیگەیاند، ئەو 110 كۆچبەرە لەڕێگەی هەردوو فڕۆكەخانەی هەولێر و بەغدادەوە دەگەڕێندرێنەوە.
لەگەڵ سەرهەڵدانی دوایین شەپۆلی كۆچكردن لە هەرێمی كوردستان و عێراقەوە بۆ ئەوروپا و داخستنی سنوورەكانی یەكێتیی ئەوروپا بەڕووی كۆچبەراندا، حكومەتی عێراق لەڕێگەی چەندین گەشتی ئاسمانییەوە بەشیك لەو كۆچبەرانەی گەڕاندووەتەوە كە خۆویستانە دەگەڕێنەوە.
پێشتر ئەحمەد سەحاف ئاشكرایكردبوو، تا ئێستا سێ هەزار و 556 كۆچبەر گەڕێندراونەتەوە و لەڕێگەی نۆ گەشتی ئاسمانییەوە بە فڕۆكەكانی هێڵی ئاسمانیی عێراق هاتوونەتەوە وڵات.
بەپێی وتەی ئەحمەد سەحاف، تا ئێستا وەزارەتی دەرەوە 383 پاسپۆرتی داوە بەو هاوڵاتییانەی لە بیلاڕوسیا و لیتوانیا و لاتڤیا و پۆڵەندا پاسپۆرتەكانیان ونكردوون، باڵیۆخانەكانی عێراق لە مۆسكۆ و وارشۆ بە بەردەوامی كاردەكەن بۆ ئەوەی پاسپۆرت بدرێت بەو هاوڵاتییانە و بتوانن بگەڕێنەوە.
