سەرۆكی دەستەی وزەی ئەتۆمی ئێران دەڵێت، تاران نایەوێت ڕێژەی 60%ی پیتاندنی یۆرانیۆم ببەزێنێت.
محەمەد ئیسلامی، سەرۆكی دەستەی وزەی ئەتۆمی ئێران لە لێدوانێكی ڕۆژنامەوانیدا ڕایگەیاند، تەنانەت ئەگەر لایەنەكانی ڕێككەوتنی ئەتۆمی شكستبهێنن لە زیندووكردنەوەی و، سزاكانی ئەمریكاش لەسەر تاران هەڵنەگیران پیتاندنی یۆرانیۆم 60% تێناپەڕێنێت.
وتیشی، “هەموو ئامانجەكانمان لەوەی پەیوەندی بە پیتاندنی یۆرانیۆمەوە هەیە پڕكردنەوەی پێداویستییە پیشەسازی و بەرهەمهێنانەكانە، بەهەمان شێوە پڕكردنەوەی پێداویستییەكانی بەكاربردنە لەو شمەكانەی ئەمڕۆ وڵاتەكەمان و هاوڵاتییەكانمان دەیانەوێت”.
لێدوانی بەرپرسەكەی ئەتۆمی ئێران لەكاتێكدایە تائێستا گفتوگۆكانی ڤیەننا سەبارەت بە زیندووكردنەوەی ڕێككەوتنی ئەتۆم سەرەڕای ئەوەی چەند گەڕێكی تێپەڕاندووە، بەڵام ئەنجامێكی ئەوتۆی لێنەكەوتووەتەوە.
