عێراق دوایین قیستى قه‌ره‌بووكردنه‌وه‌ى كوه‌یتى دایه‌وه، كه بڕه‌كه‌ى 44 ملیۆن دۆلار بوو، به‌وه‌ش دۆسیه‌ى قه‌ره‌بووكردنه‌وه‌ى وڵاته‌كە داخرا.
بانکی ناوەندیی عێراق لە ڕاگەیەندراوێکدا ئاماژه‌ى به‌وه‌كردووه، دوێنێ دوایین قیستی کوەیت-یان داوه‌ته‌وه، کە بڕەکەی 44 ملیۆن دۆلار بووه، به‌وه‌ش عێراق سەرجەم ئەو قەرزانەی دایەوە کە بەپێی بڕیاری 687ی ساڵی 1991ی ئەنجومەنی ئاسایش بەسەریدا سەپێنرابوو و بڕه‌كه‌ى 52.4 ملیار دۆلاری ئه‌مریكى بوو.
بانكى ناوه‌ندى خوازیاره دانه‌وه‌ى ته‌واوى قه‌رزه‌كانى سه‌ر وڵاته‌كه‌ى هاوكاربێت لە دەرچوونی عێراق لەژێر بەندی حەوتی نەتەوە یەکگرتوەکان و ببه‌سترێنه‌وه بە بانکی نێودەوڵەتییەوە و ئاڵوگۆڕێکی بەهێزی دارایی لەنێوان عێراق و سیست‌می دارایی وڵاتانی جیهاندا دروست ببێت.
2ی ئابی 1990 سوپای ڕژێمی پێشووی عێراق پەلاماری کوەیتی دا.
له شوباتی 1991 هێزەکانی هاوپەیمانان سوپای عێراقیان لە کوەیت ده‌ركرد و دواتریش نەتەوە یەکگرتووەکان بەپێی بڕیاری ئەنجومەنی ئاسایشی نێودەوڵەتی، كه له‌و ساڵه ده‌رچوو، بڕیاری دا قەرەبووی کوەیت بکرێتەوە، ئەوه‌ش به‌هۆی داگیركردنى ئه‌و وڵاته له‌لایه‌ن حکومەتی بەعسه‌وه له ساڵى 1990دا.
