ئه‌مڕۆ شاندێكی چێوەی هەماهەنگیی شیعەكان، به سه‌رۆكایه‌تیی نوری مالكى سەردانی هەرێمی كوردستان دەكات، لەگەڵ بەشێك لە لایەنە كوردستانییەكان كۆدەبنەوە.
چێوەی هەماهەنگی هاوپەیمانێتییەكە لەنێوان بەشێك لە لایەنە شیعییەكان، نوری مالكی لە دەوڵەتی یاسا سەرۆكایەتیی دەكات، هاوپەیمانیی فەتحی هادی عامری و چەند لایەنێكی دیكەی شیعی، بەتایبەت نزیكەكانی ئێران لە چێوەكەدان، جگە لە ڕەوتی سەدر.
لەبارەی سەردانەكەوە، پێشتر بەها نوری، وتەبێژی فەرمیی هاوپەیمانیی دەوڵەتی یاسا به تۆڕی میدیایی ئێستای وتبوو، “شاندێكی چێوەی هەماهەنگی بەسەرۆكایەتیی نوری مالكی سەرۆكی دەوڵەتی یاسا دێته هه‌رێم، له سه‌ردانه‌كه‌یاندا لەگەڵ لایەنە كوردییەكاندا گفتوگۆدەكەن لەبارەی پێكهێنانی حكومەتەوە”.
باسی له‌وه‌شكردبوو، “ئامانجمان پێكهێنانی حكومەتێكی تەوافوقیی بەهێزە، بۆیە لەگەڵ كورد و لایەنە سوننییەكان و سەربەخۆكانیشدا دانوستاندن دەكەین بەمەبەستی ڕێككەوتن”.
شانده‌كه‌ى چێوه‌ى هه‌ماهه‌نگى سەرەتا سەردانی هەولێر دەكەن و لەگەڵ مەسعود بارزانی سەرۆكی پارتی دیموكراتی كوردستان كۆدەبنەوە، دواتر لەگەڵ سەركردە و بەرپرسانی یەكێتیی نیشتمانیی كوردستانیش كۆدەبنەوە.
بە ئەگەرێكی زۆر، شاندەكەی چێوەی هەماهەنگی بۆ كۆبوونەوەی لەگەڵ یەكێتیدا سەردانی سلێمانی دەكات.
پێشتر شاندی ڕەوتی سەدریش سەردانی هەرێمی كوردستانی كردووە و لەگەڵ بەشێك لە لایەنە كوردستانییەكان كۆبووەتەوە.
زیاتر لە جارێك پارتی دیموكراتی كوردستان و ڕەوتی سەدر باسیان لە بوونی لێكتێگەیشتن كردووە لەنێوانیاندا بۆ پێكهێنانی حكومەتی داهاتوو و دووپات لە نزیكیی دیدی هەردوولا كراوەتەوە.
