وه‌زاره‌تى دارایی بەردەوامە لە بڵاوكردنەوەی لیستی مووچەی مانگی تشرینی دووەم، بڕیارە سبەینێ مووچەی وەزارەتێكی دیكە دابەشبكرێت.
سه‌رچاوه‌یه‌ك له وه‌زاره‌تى دارایی و ئابوریی هه‌رێم لیستێكی نوێی مووچەی بۆ تۆڕی میدیایی ئێستا ئاشكراكرد و ڕاگه‌یاند، “سبه‌ینێ یه‌كشه‌ممه مووچه‌ى وه‌زاره‌تى كاره‌با دابه‌شده‌كرێت”.
وتیشی، ڕۆژى پێنجشه‌ممه مووچه‌ى وه‌زاره‌تى ئاوه‌دانكردنه‌وه دابه‌شكراوه.
لەگەڵ ئەوەی سەرچاوەكەی وەزارەتی دارایی هۆكاری سستیی دابەشكردنی مووچەی بۆ نەناردنی 200 ملیار دینارەكە گەڕاندەوە، بەڵام پێشتر عەلی حەمەساڵح هۆكارەكەی بۆ كۆنەكردنەوەی داهاتی ناوخۆیی گەڕاندبووەوە.
پێشتریش فارس عیسا نوێنه‌رى حكومه‌تى هه‌رێمى كوردستان له به‌غداد به تۆڕی میدیایی ئێستاى وتبوو، به‌هۆی ئه‌وه‌ى وه‌زاره‌ته‌كانى دیكه‌ى عێراق پاره‌دار (ته‌مویل) نه‌كراون، 200 ملیار دیناره‌كه ڕه‌وانه‌نه‌كراوه.
