وەزارەتی دارایی و ئابوریی هەرێمی كوردستان سەرجەم خەرجییەکانی ساڵی دارایی 2021 جگە لە مووچە و چه‌ند پێشینه‌یه‌ك ڕاده‌گرێت.
له نووسراوێكدا كه واژووى ئاوات شێخ جه‌ناب وه‌زیری دارایی لەسەرە، بڕیاردراوە بە ڕاگرتنی سەرجەم خەرجییەکانی ساڵی دارایی 2021.
لە نووسراوەکەدا داهاتووه، بەهۆی نزیکبوونەوەی ساڵی دارایی 2022 و دیاریکردنی هەلی گونجاو بۆ یەکە ژمێرییەکانی بەستراو و نەبەستراو بە وەزارەتەکان، بەمەبەستی پاکتاوکردنی ژمێرکارییەکان، گەیاندنیان بە وەزارەت، وەزارەتی دارایی چەند بڕیارێکی دەرکردووە، لەوانە:
1- ڕاگرتنی سیسته‌می ئۆنلاین لە ڕێکەوتی دەرچوونی ئەو ڕێنماییە تاوەکو کردنەوەی خەرجی لە ساڵی دارایی 2022.
2- ڕاگرتنی گشت خەرجییەک لە ڕۆژی 16-12-2021 بۆ ساڵی دارایی 2021 (جگە لە مووچە و پێشینەی خەرجکراوی مانگانە، کرێی مانگانە و خەرجییەکانی پاککردنەوە و خواردن).
3- ڕاگرتنی زیادکردنی پێشینەی بەردەوامی مانگانە.
4- ئەم ڕاگرتنە تەمویلکردنی تایبەت بە پڕۆژەکانی وەبەرهێنان و پەرەپێدانی پارێزگاکان ناگرێتەوە.
5- لە ڕێکەوتی دەرچوونی ئەم ڕێنماییەوە، هیچ داواکارییەکی خەرجی ئاراستەی وەزارەتمان نەکرێت.
6- ئەو نووسراوانەی کە فەرمانی خەرجکردنی وەزارەتمانیان هەیە، لە بەڕێوەبەرایەتیی گشتیی ژمێرکاری/ بەڕێوەبەرایەتیی خەرجییەکان، کە ئاراستەی گەنجینەکان دەکرێت و ڕێکەوتی دەرکردنیان دەکەوێتە پێش 16-12-2021 جێبەجێدەکرێن و ڕاناگیرێن. ئەو نووسراوانەی کە داخڵی سیستەم کراون و کاریان لەسەر نەکراوە، لە ساڵی نوێدا کاریان لەسەر دەکرێت.
7- ئەم ڕێنماییە لە ڕۆژی 16-12-2021 کاریان پێدەکرێت و لە ڕۆژنامەی وەقائیعی کوردستان بڵاودەکرێنەوە.
