خاوەنكارێك لە هەولێر: كەسم نەكردە شەریك و بەرتیلم نەدا بۆیە ڕێگرییان لە پڕۆژەكەم كرد

خانووەكانی فلۆریا سیتی

خاوەنی پڕۆژەی نیشتەجێبوونی فلۆریا سیتی هۆكاری دواكەوتن و تەواونەبوونی پڕۆژەكەی بۆ ڕێگریی كەس و لایەنەكان لە هەولێر دەگەڕێنێتەوە و دەڵێت، كەسم نەكردە شەریك و بەرتیلم نەدا بۆیە ڕێگرییان لە پڕۆژەكەم كرد.

محەمەد نەورۆزی، خاوەنی پڕۆژەی فلۆریا سیتی لە هەولێر كە پڕۆژەكەی ماوەی زیاتر لە 10 ساڵە مۆڵەتی پێدراوە و هێشتا تەواونەبووە، هۆكارەكەی ئاشكرادەكات و دەڵێت، لە 29ی 6ی 2010 مۆڵەتیان پێداوە پاش ئەوەی 27 ملیۆن دۆلاری داوە بە حكومەت و قەرزی خەڵكیش كە لەسەر وەبەرهێنەری پێشوو بووە داویەتییەوە.

نەورۆزی لە چاوپێكەوتنێكدا كە پەیجی (MN) تایبەت بە موڵك بڵاویكردووەتەوە، باس لەو هەڵەیەش دەكات كە لە مۆڵەتەكەدا لەلایەن لیژنەیەكی حكومییەوە كراوە و دەڵێت، بەپێی مۆڵەتەكە فلۆریا سیتی لەسەر هەشت سەنەد دروستدەكرێت، بەڵام دوای دوو ساڵ بۆی دەركەوتووە زەوییەكە هەشت نییە، بەڵكو 717 تاپۆیە و “لەسەر تاپۆی دوو نییە، تاپۆی یەكە، ئەوبەری جادە نییە، ئەمبەرە، بەناوی حكومەت نییە، بەناوی ئەحمەد مەلاقادرە”.

ئاشكراشیدەكات، سەرەڕای بوونی مۆڵەت و ڕێگەپێدانی ئەنجومەنی وەزیران و ئەنجومەنی باڵای وەبەرهێنان، چەند جارێك بە بیانووی جیاجیا و بە ناردنی هێز و پۆلیس پڕۆژەكەیان پێڕاگرتووە.

بە وتەی خاوەنەكەی، پڕۆژەكە لەسەر 659 هەزار مەتر دووجا بونیادنراوە و “تائێستا 142 ملیۆن دۆلاری تیادا خەرجكراوە كە 68 ملیۆن دۆلاری هی خەڵكە” جگە لەوەی حساب بانكیی خۆی لە توركیاوە گەڕاندووەتەوە بۆ هەولێر، بەڵام لەبری ئاسانكاری، دەستبەسەر پارەكەیدا گیراوە و تەنها 2400ی بۆ خراوەتەسەر حسابەكەی تا ئیشی پێبكات.

سەبارەت بە هۆكاری ڕێگرییەكان و دروستكردنی ئەو كێشانە، نەورۆزی دەڵێت، “كەسم نەكردە شەریكی خۆم و بەرتیلم بە كەس نەدا”. ئەوەش دەخاتەڕوو لە دەستەی وەبەرهێنان بە ئاشكرا “داوای بەرتیلیان لێكرم” ئەو پرسەشی گەیاندووەتە لایەنی پەیوەندیدار، بەڵام كەس گوێی لێنەگرتووە.

بابەتی پێشتر

بیتکۆین ڕێژەی 12%ـی نرخەکەی لەدەست دا

بابەتی دواتر

ڕێكخراوێكی مافی مرۆڤ: لە ماوەی مانگێكدا 25 ژن لە توركیا كوژراون

بابەتی پەیوەندیدار
زیاتر ببینە

لە کەرکوک کەسێک کوژرا

کەمێک لەمەوبەر لە شەقامی پشتێنەیی کەرکوک کەسێک لەناو ئۆتۆمبێلەکەی خۆیدا کوژرا. پەیامنێری تۆڕی میدیایی ئێستا گواستییەوە، “کەمێک پێش…
Total
0
Share