له سعودیه یه‌كه‌م حاڵه‌تى تووشبووى گۆڕاوى ئۆمیكرۆن تۆماركرا، لەكاتێكدا زیاتر له 200 عو‌مره‌كارى كورد له‌و وڵاته‌ن بۆ به‌جێگه‌یاندنى گه‌شتى عو‌مره.
میدیا ناوخۆییه‌كانى سعودیه له زارى سەرچاوەیەك لە وەزارەتی تەندروستیی وڵاته‌كه‌یانه‌وه ئاشكرایانكرد، ئەمڕۆ چوارشەممە یەكەم تووشبووی گۆڕاوی ئۆمیكرۆن لە شاری مەككە تۆماركراوه، كە هاوڵاتیی یەكێك لە وڵاتانی باكووری ئەفریقایە.
بە تۆماركردنی ئەو حاڵەتە، سعودیە دەبێتە یەكەم وڵاتی عەرەبی گۆڕاوی ئۆمیكرۆنی تێدا تۆماربكرێت.
تۆماركردنی تووشبووەكەی ئۆمیكرۆن لە سعودیە لەكاتێكدایە ژمارەیەك هاوڵاتیی هەرێمی كوردستان لەو وڵاتەن بۆ بەجێگەیاندنی گه‌شتى عومرە.
شێخ نیاز محه‌مه‌د، به‌ڕێوه‌به‌رى حه‌ج و عومره‌ى هه‌رێمى كوردستان به تۆڕی میدیایی ئێستاى ڕاگه‌یاند، له ئێستادا زیاتر له 200 عو‌مره‌كارى هه‌رێم له وڵاتى سعودیه‌ن بۆ به‌جێگه‌یاندنى گه‌شتى عو‌مره.
بەڵام ئاشكرایكرد، تائێستا هیچ ڕێنماییه‌كیان پێنگه‌یشتووه بۆ چۆنێتیی گه‌ڕانه‌وه‌ى ئه‌و عو‌مره‌كارانه و دیار نییه چ ڕێكارێكى ته‌ندروستى ده‌گیرێته‌به‌ر.
