لە پارێزگای سلێمانی، کێشەی کەرتی تەندروستی، جگە لە دابیننەکردنی شایستە داراییەکانی کۆمپانیاکانی دەرمان، وەڵامنەدانەوە و خەمساردیی وەزارەتە بۆ داواکارییەکانی سنووری سلێمانی، بۆیە جێگری بەڕێوەبەری گشتیی تەندروستیی سلێمانی بایکۆتکردنی کۆبوونەوەکانی ئەنجومەنی وەزارەتی لەلایەن بریكار و بەڕێوەبەرە گشتییەكانەوە ئاشكراكرد.
لە لێدوانێکدا بۆ تۆڕی میدیایی ئێستا، دکتۆر هێرش سەید سەلیم جێگری بەڕێوەبەری گشتیی تەندروستیی سلێمانی ڕایگەیاند، “ئەو نووسراو، داواکاری و پێشنیازانەی ئاراستەی وەزارەتی تەندروستیی دەکەین، بە ڕۆتینی زۆردا دەڕۆن و ماوەیەکی زۆر دوادەخرێت تاوەکو وەڵاممان دەدرێتەوە، چ لەڕووی داواکاریی پێداویستیی پزیشکی، نۆژەنکردنەوە، یان هەر پێشنیازێکی دیكە بێت”.
جێگری بەڕێوەبەری گشتیی تەندروستیی سلێمانی، ئاماژە بە قەتیسکردنی دەسەڵاتەکانی بەڕێوەبەرایەتییەکەیان لەلایەن وەزارەتەوە دەکات و وتی، “وەزیری تەندروستی بەشێک لەو دەسەڵاتانەی کە دەبێت لای بەڕێوەبەرایەتییەکان بێت و ئیمە وەک بەڕێوەبەرایەتی دەبێت ئەو دەسەڵاتانەمان هەبێت، لای خۆی قەتیسی کردووە”.
بۆیە دکتۆر هێرش ئاشكرایكرد، “بەهۆی هەموو ئەو تێبینییانە، بریکاری وەزیر، ڕاوێژکارێکی سەر بە زۆنی سلێمانی و بەڕێوەبەرایەتییەکانی سلێمانی، هەڵەبجە، ڕاپەڕین و گەرمیان بایکۆتی کۆبوونەوەی ئەنجومەنی وەزارەتیان کردووە”.
ڕەخنەشی لە خەمساردیی وەزارەتیش گرت بەوەی تا ئێستا وەڵامدانەوەی بۆ ئەو بابەتە نەبووە، وتی، “ناکرێت وەزارەتێک بە وەزیرێک و سێ بۆ چوار بەڕێوەبەری گشتییەوە کۆببێتەوە”.
”پێویستە ئەنجومەنی وەزیران بەدواداچوون و لێپرسینەوە لەو بابەتە بکات کە بایکۆتکردنی ئەنجومەنی وەزارەتێک هیچ لێپرسینەوەیەکی لەلایەن وەزیرەوە لەبارەوە نەکراوە”، جێگری بەڕێوەبەری گشتیی تەندروستیی سلێمانی وایوت.
