وتەبێژی جێگری سەرۆك وەزیرانی هەرێم لێدوانی پەرلەمانتارێكی پارتی ڕەتدەكاتەوە و دەڵێت، بێئاگایی و بێتوانایی خۆی سەلماندووە.
سەمیر ھەورامی، وتەبێژی فەرمی جێگری سەرۆكی ئەنجومەنی وەزیرانی هەرێم ڕوونكردنەوەیەكی بڵاوكردەوە و تیایدا هاتووە، ھێڤیدار ئەحمەدی پەرلەمانتار، لێدوانێكی داوە و ناوی تیمی یەكێتی لە حكومەتی ھەرێمی كوردستان ھێناوە، بۆ ھەموو لایەكی ڕووندەكەینەوە؛ قسەكانی ئەو پەرلەمانتارە دوورن لە ڕاستییەوە و بێئاگایی و بێتوانایی خۆی سەلماندووە لەو لێدوانەیدا.
دەشڵێت، “داتا و ئامارەكانیش سەلمێنەری ئەوەن كە ئەو پەرلەمانتارە ھیچ زانیارییەكی دروستی نییە و کەس لێدوانەكانی بەجددی وەرناگرێت، چونكە زوو زوو پەنادەباتەبەر موزایەدە و دووبارە سەلماندی کە ئەو پەرلەمانتارێکی فاشلە”.
ئەمڕۆ لەمیانەی لێدوانیدا بۆ كەناڵێكی تەلەفزیۆن هێڤیدار ئەحمەد، ئەندامی پەرلەمانی كوردستان ڕاگەیاندبوو، داهات لە پارێزگای سلێمانی کۆناکرێتەوە بۆیە مووچە بە سستی دابەشدەکرێت و گوایە ئەو پرسە لەلایەن قوباد تاڵەبانی بە وەزیرەکان و تیمی پارتی لە حکومەت وتراوە.
