لەلایەن فڕۆكەكانی سوپای توركیاوە دەوروبەری گوندێكی سەر بە قەزای ئامێدی بۆردومانكرا.
کاتژمێر 7:00ی ئێوارەی ئەمڕۆ فڕۆکە جەنگییەکانی تورکیا بەچری بۆردومانی دەوروبەری گوندی هرورێ لە ناحیەی کانی ماسێ-ی سنووری قەزای ئامێدی کرد. دوای بۆردومانەكەش شەڕ و پێکدادان لە نێوان هێزەکانی پەکەکە و سوپای تورکیا ڕوویدا.
پەیامنێرمان لە دهۆك پێی ڕاگەیاندین، لە بۆردومان و شەڕ و پێکدادانەکاندا زیان بەر خەڵکی سڤیل نەکەوتووە، بەڵام ترس و دڵەڕاوکێیەکی زۆری لای هاووڵاتیانی گوندەکە دروستكردووە.
دوێنیش بۆردومانی فڕۆکە و شەڕ و پێکدادانی زەمینی لە نێوان هێزەکانی پەکەکە و سوپای تورکیا لە دەوروبەری گوندی هرورێ ڕوویدا، لە ترسی دەنگی تەقە و بۆردومان خوێندنکاران خوێندنگایان چۆڵكرد.
