ئەمڕۆ کەسێک لە هەولێر دوو فیشەکی بە ژنەکەیەوە نا و برینداریکرد، لەكاتێكدا چەند ڕۆژێكە هەڵمەتی بەرەنگاربوونەوەی توندوتیژی دژی ژنان دەستیپێكردووە.
پۆلیسی هەولێر لەسەر ڕووداوەکە دەڵێت، “ئەمڕۆ پاش نیوەرۆ دوای بیستنی دەنگی تەقە لە گەڕەکی كارێزان، دەستبەجێ ھێزەکانمان لە بنکەی پۆلیسی باداوە گەیشتنە شوێنی مەبەست و کەسی تەقەکەریان بەناوی (ھ. ع. ق) دەستگیرکرد، کە خێزانی خۆی بە دوو گوللـە بریندار کردبوو”.
پۆلیس ئاماژەی بەوەشکردووە “دەستیان بەسەر چەکی بەکارھاتوودا گرتووە لە جۆری کڵاشینکۆڤ و دەمانچە و چەقۆیەک، خێزانەکەشی گواستراوەتەوە بۆ نەخۆشخانە و تۆمەتباری ناوبراویش پەڕاوی بۆ کراوەتەوە بۆ گرتنەبەری ڕێکاری یاسایی لە دژی”.
لە 25 ی ئەم مانگەوە ڕێکخراوەکانی مافی مرۆڤ و ژنان، بە پشتگیریی حکومەتی هەرێم، هەڵمەتی 16 ڕۆژەی بەرەنگاربوونەوەی توندوتیی دژی ژنانیان دەستپێكردووە، هاوكات لەگەڵ هەڵمەتەكە لە تەواوی جیهاندا.
