لێپرسراوی مەڵبەندی حەمرینی یەکێتیی نیشتمانیی کوردستان ڕایگەیاند، ھەواڵی چەواشەکارانە لە چەند پەیجێک بڵاوکراوەتەوە کە گوایە ھاوپەیمانی کوردستان کورسیی پارێزگای سەڵاحەدینی لەدەستداوە، ئەوە ڕاست نییە.
کەریم شکور، لێپرسراوی مەڵبەندی حەمرینی یەکێتیی نیشتمانیی کوردستان لە هەژماری خۆی لە تۆڕی کۆمەڵایەتیی فەیسبووک ڕایگەیاندووە، ” ئێمە خەڵکی خۆمان دڵنیادەکەینەوە کە سەرلەبەری ئەو ھەواڵانە ناڕاستن و دوورن لە ڕاستییەوە، دەنگی ئێمە بە ئەلیکترۆنی و ژماردنی دەست ھاوتابووە و ھیچ کێشەیەکی نییە، دووبارە دڵنیابن کە ھاوپەیمانی کوردستان خاوەنی کورسیی سێیەمی بازنەی دووی پارێزگای سەڵاحەدینە”.
کۆمسیۆنی باڵای سەربەخۆی هەڵبژاردنەکان، پێشتر ڕایگەیاندبوو، ئەو تانانەی لە ئەنجامەکان دراون و دراونەتە دەستەی دادوەری، تەنها گۆڕانکاری لە شەش کورسیدا دروستدەکەن، کە ئەوانیش پارێزگاکانی “بابل و هەولێر و نەینەوا”ن.
