بزوتنەوەى گۆڕان داوادەکات حکومەت و وەزارەتە پەیوەندیدارەکان لەبری بەکارھێنانی توندوتیژی و گوێنەگرتن لە داواکانیان، داخوازییەکانیان جێبه‌جێبكه‌ن و دەرماڵە و پێداویستییەکانی خوێندنیان بۆ دابینبکەن.
بزوتنه‌وه‌ى گۆڕان له‌سه‌ر خۆپیشاندانه‌كانى ئه‌مڕۆ ڕاگه‌یه‌ندراوێكى بلاوكرده‌وه و ئاماژه‌ى به‌وه‌كردووه، “ئەرکی ھێزە ئەمنییەکانه مامەڵەیەکی تەندروست و مەدەنییانە لەگەڵ خۆپیشاندەران بکەن و ھاوکاری ئارامی و ئاسایشی شارەکان و پاراستنی گیانی خۆپیشاندەران بن.”
دەقى ڕاگەیەندراوەکەى بزوتنەوەى گۆڕان
پشتگیری تەواوی داوا ڕەواکانی خوێندکارانی زانکۆ و پەیمانگاکانی پارێزگاکانی سلێمانی، ھەڵەبجە، ئیدارەکانی ڕاپەڕین و گەرمیان دەکەین، کە ئەمڕۆ (دووشەمە ٢٢ی١١ی٢٠٢١) بەھۆی خۆپیشاندان بۆ داواکردنی دەرماڵەکانیان روبەڕووی توندوتیژی و ئازاردان بوونەوە و ژمارەیەکیان دەستگیرکران.
ئێمە لە کاتێکدا لەگەڵ مافە ڕەواکانی خوێندکارانین و دەنگمان لەگەڵ دەنگیانە، داواش دەکەین حکومەت و وەزارەتە پەیوەندیدارەکان لەبری بەکارھێنانی توندوتیژی و گوێنەگرتن لە داواکانی خوێندکاران، بەپیر داخوازییەکانیانەوە بچن و دەرماڵە و پێداویستیەکانی خوێندنیان بۆ دابین بکەن.
ئەرکی ھێزە ئەمنیەکانیشە مامەڵەیەکی تەندروست و مەدەنیانە لەگەڵ خۆپیشاندەران بکەن و ھاوکاری ئارامی و ئاسایشی شارەکان و پاراستنی گیانی خۆپیشاندەران بن.
بزوتنەوەی گۆڕان
22ی 11ی 2021
