48 پەرلەمانتار واژوویان كۆكردووەتەوە بۆ گفتوگۆكردن لەسەر پرسی دەرماڵەی خوێندكاران، فراكسیۆنەكانی پارتی و پێكهاتەكان واژوویان لەسەر داواكە نەكردووە و سەرۆكایەتیی پەرلەمانیش نەیخستووەتە بەرنامەی دانیشتنی سبەینێوە.
ئاشنا عه‌بدوڵڵا، ئه‌ندامى لیژنه‌ى په‌روه‌رده و خوێندنى باڵا له په‌رله‌مانى كوردستان به تۆڕی میدیایی ئێستاى ڕاگه‌یاند، “له 14ی مانگه‌وه نووسراومان پێشكه‌شى سه‌رۆكایه‌تیی په‌رله‌مان كردووه تاوه‌كو پرسی خه‌رجكردنەوەى ده‌رماڵه‌ى خوێندكارانى زانكۆ و په‌یمانگاكان بخاته نێو كارنامه‌ى كۆبوونه‌وه‌كانى، به‌ڵام تاوه‌كو ئێستا وه‌ڵامى دواكارییه‌كه‌مان نه‌دراوه‌ته‌وه”.
وتیشی، “به‌پێی په‌یڕه‌وى ناوخۆی په‌رله‌مان پێویسته له نزیكترین دانیشتندا ئه‌و پرسه بخرێته كارنامه‌ى كۆبوونه‌وه‌كانه‌وه، به‌ڵام هێشتا وه‌ڵامى نووسراوه‌كه‌مان نه‌دراوه‌ته‌وه كه واژووى 48 په‌رله‌مانتارى له‌سه‌ره”.
ئه‌و په‌رله‌مانتاره ئاشكراشیكرد، “پارتى و پێكهاته‌كان واژووى نووسراوه‌كه‌یان نه‌كردووه بۆ ئه‌وه‌ى دانیشتنێك له‌سه‌ر ئه‌و پرسه ئه‌نجام بدرێت”.
بەپێی وتەی ئەندامەكەی لیژنه‌ى په‌روه‌رده و خوێندنى باڵا، له نووسراوه‌كه‌یاندا داوایانكردووه لایه‌نى په‌یوه‌ندیدار و حكومه‌ت، بەتایبەت وه‌زاره‌تەكانى دارایی و خوێندنى باڵا ده‌گرێته‌وه، بێنه په‌رله‌مان و وه‌ڵامى په‌رله‌مانتاران بده‌نه‌وه له‌باره‌ى هۆكارى خه‌رجنه‌كردنه‌وه‌ى ده‌رماڵه‌ى خوێندكاران.
ئاشنا عەبدوڵا پەرلەمانتاری گۆڕانە، جگە لە ڕەخنەگرتن لە بێهەڵوێستیی وەزارەتی خوێندنی باڵا، ڕەخنەی لە وەزارەت و وەزیری دارایی هەرێمیش گرت، كە سەر بە بزوتنەوەی گۆڕانە، بەوەی تا ئێستا لەبارەی گەڕاندنەوەی دەرماڵەی خوێندكارانەوە هەنگاویان نەناوە.
