ئاوی سلێمانی: لە 24 کاتژمێری داهاتوودا کێشەی شکانی بۆرییەکە چارەسەردەكرێت

وتەبێژی بەڕێوەبەرایەتیی ئاوی سلێمانی ڕایگەیاند، تیمەکانیان لە هەوڵدان تا 24 ‏کاتژمێری داهاتوو، کێشەی شکانی بۆریی ئاوی دوکان چارەسەر بکەن.‏

ئامانج جەلال، وتەبێژی بەڕێوەبەرایەتی ئاوی سلێمانی بە تۆڕی میدیایی ئێستای ڕاگەیاند، ‏‏”بەهۆی شکانی بۆرییەکەوە ئێستا 70%ی گەڕەکەکانی سلێمانی بێئاو بوون، لەگەڵ ئەو ‏قەزا و ناحییانەی لەو پڕۆژەیەوە ئاویان بۆچووە”.‏

بە وتەی وتەبێژی ئاوی سلێمانی، تیمەکانیان هەموو هەوڵێک دەدەن، تا لە نزیکترین کاتدا ‏ئاو بگەڕێننەوە و گرفتی شکانی بۆرییەکە چارەسەربکەن.‏

دوێنێ بەڕێوەبەرایەتیی ئاوی سلێمانی ڕایگەیاند، “بڕانی لەناکاوی کارەبا لە هێڵی دووی ‏ئاوی دوکان – سلێمانی، بووەهۆی شکانی بۆریی پڕۆژەکە، بەو هۆیەوە بۆ ماوەی 24 ‏کاتژمێر، دابەشکردنی ئاو لە زۆربەی گەڕەکەکانی شاری سلێمانی و قەزا و ناحیەکانی ‏شۆڕش، چەمچەماڵ، تەکێ، بازیان، گۆپاڵە و پیرەمەگروون دەوەستێت”.‏

دوای ئەو ڕوونکردنەوەی ئاوی سلێمانی، بەڕێوەبەرایەتی دابەشکردنی کارەبای سلێمانی ‏ڕایگەیاند، “بێئاوبوونی چەند شوێنێکی سلێمانی و دەوروبەری بەهۆی پچڕانی کارەباوە ‏نییە، بەڵکو دوای تەقینی بۆرییەکە، کارەباکەی کوژێنراوەتەوە”.‏

بەڵام لە لێدوانەكەیدا بۆ ئێستا، ئامانج جەلال، وتەبێژی بەڕێوەبەرایەتیی ئاوی سلێمانی ‏سووربوو لەسەر ڕاگەیەندراوەكەی پێشوویان.‏

بابەتی پێشتر

خۆپیشاندانی خوێندكاران بۆ داواكردنی دەرماڵە درێژەی هەیە

بابەتی دواتر

خەزعەلی داوای ڕادەستكردنی چالاكوانێكی عەرەب لە حكومەتی هەرێم دەكات

بابەتی پەیوەندیدار
Total
4
Share