زیاتر لە 400 کۆچبەری کورد لە بیلاڕوسیاوە گەڕانەوە هەرێمی کوردستان، بەشێک لەو کۆچبەرانە ئاشکرایدەکەن، لەلایەن پۆلیسی بیلاڕوسەوە ئەشکەنجەدراون.
بەشێک لە کۆچبەرە کوردەکان، قسەیان بۆ ئاژانسە جیهانییەکان کردووە و پیاوێکی دهۆکی تەمەن 38 ساڵ، کە لە کۆچبەرە گەڕاوەکانە دەڵێت، سەربازانی بیلاڕوس نە ئاویان پێداون، نە نان و ڕۆژانێکی زۆر برسێتی و تینویەتییان چەشتووە.
بەشێک لە کۆچبەرەکان نەیانشاردووەتەوە، ئەوان دەیانەوێت جارێکی دیکە و لە دەرفەتێکی دیکەدا خۆیان بگەیەننە وڵاتێکی ئەوروپی.
ژنێکی ئێزدی تەمەن 71 ساڵ، قسەی بۆ ئاژانسی ئەڵمانی دی دەبلیو کردووە و دەڵێت، “نا مرۆڤانە مامەڵەی لەگەڵدا کراوە و دەیەوێت خۆی بگەیەنێتە ئەڵمانیا، چونکە لە عێراقدا، ئایندەی کەمایەتییە ئاینییەکان دیار نییە”.
پیاوێکی هەولێری تەمەن 41 ساڵ لەکاتی باسکردنی دۆخی بیلاڕوسیا و کۆچبەران وتی، “ئێمە لەلایەن پۆلیسی بیلاڕوس و پۆڵەنداوە ئازاردراوین، بەڵام پۆلیسی بیلاڕوس ئێمەی فریودا”.
ئەم قسانەی کە ئەم هاوڵاتییە کوردانە لەبارەی دۆخی کۆچەوە باسیانکردووە، هێشتا بۆ کۆمەڵێک کۆچبەری کورد ئەگەرێکی کراوەیە و لەبەردەمیاندایە، چونکە ئەو کۆچبەرانە تا ئێستاش دەرگای ئەوروپا دەکوتن، تا یەکێک لە وڵاتان دەرگایان لێبکەنەوە.
