كۆمەڵەی پێشمەرگە دێرینەكان، لەسەر هاوتاكردنی جاش و مستەشارەكان بە هاوشانی پێشمەرگە و هەژماركردنی خزمەت بۆیان، سكاڵا لەسەر حكومەتی هەرێمی كوردستان تۆماردەكات.
ئەمڕۆ كۆمەڵەی پێشمەرگە دێرینەكان گردبوونەوەیەكی ناڕەزایەتییان سازكرد، بڕیاریشیان داوە سكاڵا لەسەر حكومەتی هەرێمی كوردستان تۆمار بكەن.
جەمیل هەورامی، سەرۆكی كۆمەڵەی پێشمەرگە دێرینەكان لە گردبوونەكەدا قسەی بۆ میدیاكان كرد، ڕەخنەی ئەوەی لە حكومەتی هەرێمی كوردستان گرت، كە لە یاسای خانەنشینیی پێشمەرگەدا (یاسای ژماری 38ی ساڵی 2007ی خانەنشینیی پێشمەرگە)، جاش و مستەشارەكانی سەردەمی بەعسی لەگەڵ پێشمەرگەدا هاوشان كردووە و خزمەتیان بۆ هەژماردەكات.
بەوتەی هەورامی، بەپێی یاساكە، خزمەتی پێش ڕاپەڕین بۆ پێشمەرگە ساڵیك بە دووساڵ هەژماركراوە، بەڵام حكومەتی هەرێم لە یاساكەدا هەمان كاری بۆ جاش و مستەشارەكانیش كردووە و ئەوەش ناڕەزایەتیی پێشمەرگە و كۆمەڵەكەی لێكەوتووەتەوە.
سەرۆكی كۆمەڵەی پێشمەرگە دێرینەكان ڕەخنەی ئەوەشی لە حكومەتی هەرێم هەبوو، كە خانوو و زەوی دراوە بە جاش و مستەشارەكان، بەڵام نادرێت بە پێشمەرگە.
بۆیە جەمیل هەورامی دووپاتیكردەوە، سكاڵا لەسەر ئەنجومەنی وەزیران و هەریەكە لە وەزیرانی دارایی و پێشمەرگەی هەرێمی كوردستان تۆماردەكەن.
ئاماژەی بەوەشکرد، ژمارەی ڕاستیی پێشمەرگەی خانەنشینكراو نزیكەی 20 هەزار دەبن بەڵام نزیكەی 70 هەزار كەس بەناوی پێشمەرگەی دێرینەوە خانەنشینكراون.
لای خۆیەوە حەمەڕەشید قەرەداغی جێگری سەرۆكی كۆمەڵەی پێشمەرگە دێرینەكان، بەهەمانشێوە ڕەخنەی لە مامەڵەی حكومەتی هەرێم و لایەنەكان گرت لەگەڵ پێشمەرگە و جاش و مستەشارەكان.
قەرەداغی نموونەیەكی هێنایەوە بەوەی، مستەشار هەیە 15 پێشمەرگەی شەهید كردووە، ئێستا مووچەی ئەو مستەشارە لە مووچەی ئەو 15 شەهیدە زیاترە.
