کۆمسیاری باڵای کاروباری پەنابەرانی سەربە نەتەوە یەکگرتووەکان ڕایگەیاند، مۆڵەتیان وەرگرتووە بۆ دروستکردنی کامپێک لە نزیک سنوورەکانی بیلاڕوسیا و پۆڵەندا، تا هاوکاری بگەیەندرێتە کۆچبەران.
لە ڕاگەیەندراوێکدا UNHCR ئاشکرایکردووە، “لە دوای وەرگرتنی مۆڵەتەکە، هاوکارییە مرۆییەکان دەگەیەندرێتە کۆچبەران لەسەر سنوور، کە زیاتر لە دوو هەزار کۆچبەرن و لەناویاندا سەدان منداڵ بوونی هەیە”.
بڕیارە لە چەند ڕۆژی داهاتوودا، هاوکارییەکانی یو ئێن، لەوانە بەتانی و پاڵتۆ و دەستکێش و پێڵاو، بەتایبەت بۆ منداڵان بگاتە دەستی کۆچبەران، کە بە هاوکاریی مانگی سووری بیلاڕوسیا دابەشدەکرێت.
نەتەوە یەکگرتووەکان لەگەڵ ئەوەدایە کۆچبەران بگوازرێنەوە بۆ شوێنێکی دیکە تا گەیاندنی هاوکاری پێیان ئاسانتربێت، چونکە ئێستا کۆچبەران بەسەر سنوورەکەدا دابەشبوون و لەناوچەیەکی دوورەدەستن، کە تەنها سەربازان دەتوانن بگەنە ئەوشوێنە.
تیمەکەی یو ئێن لەسەر سنوور لێکۆڵینەوەش دەکات لەسەر دۆخی ژیانی کۆچبەران، چونکە وەک خۆی ئاشکرایکردووە، ئەگەری هەیە لەناو کۆچبەراندا خەڵکانێکی زۆر هەبن، بەڵگەی پێویستیان پێیە بۆ جێهێشتنی وڵات، لەگەڵ ئەوەش هاوکاریی کۆچبەران دەکرێت، بۆ گەڕانەوەی ئارەزوومەندانە، یان داوای مافی پەنابەری لە بیلاڕوسیا.
