جۆزێ مۆرینیۆی پۆرتوگالی ڕەتیكردەوە بەرازی ئاڵتونی وەربگرێت، كە مانگانە دەدرێتە خراپترین وەرزشكار و ڕاهێنەر لە ئیتاڵیا.
مۆرینیۆ ئەم وەرزە بەرامبەر یانەكانی یوڤانتۆس، میلان، هیلاس ڤیرۆنا، ڤینیسیا و لازیۆ لە خولی ئیتاڵیا شكستی هێناوە و لە خولی كۆنفرانسی ئەوروپاش بە یانەی بۆدۆ جیلمیت دۆڕا.
بەهۆی دابەزینی ئاستی یانەی ڕۆماوە، خەڵاتی بەرازی ئاڵتونی درا بە مۆرینیۆ، بەڵام ڕەتیكردەوە.
بەرازی ئاڵتونی لە ساڵی 1996ــەوە لەلایەن ئەنتۆنیۆ ڕیچی-ی دەرهێنەرەوە داهێنراوە و دەدرێتە خراپترین كەسایەتیی وەرزشی، سیاسی یان میدیاكاری ئیتاڵی.
ڕۆما لە پلەی شەشەمی ڕیزبەندیی خولی ئیتاڵیا دەبینرێت و 13 خاڵ لە دوای ناپۆلی و میلانی پێشەنگەوەیە.
